Şu günler ýurdumyzyň çar künjeginde bolşy ýaly, onuň Günbatar sebitini jähekläp oturan Balkan welaýatynda-da mekdep bazarlarynyň işi uly üstünliklere beslenýär. Welaýatyň ähli etraplarydyr şäherlerinde birkemsiz ýola goýlan mekdep bazarlarynyň, göçme söwda nokatlarynyň müşderileriniň ýetik bolmagy «Garaşsyz, baky Bitarap Türkmenistan – bedew batly at-myradyň mekany» ýylynyň barha ýakynlaşyp gelýän Bilimler we talyp ýaşlar gününe hem-de täze okuw ýylyna ählitaraplaýyn taýýarlyk görülýändigine aýdyň şaýatlyk edýär.
Günbatar sebitiň mekdep okuwçylary, talyp ýaşlarydyr ak mekdepleriň bosagasyndan ilkinji gezek ätlejek bagtyýar körpeler, olaryň ene-atalary mekdep bazarlarynyň, göçme söwda nokatlarynyň hyzmatlaryndan hoşal bolýarlar. Häzirki wagtda olar okuwçylar üçin niýetlenen mekdep esbaplaryny, oglanlar, gyzlar üçin milli egin-eşiklerdir aýakgaplary, tahýalary, ýantorbalary, dürli galamlary, depderleri, gündelikleri, reňkli kagyzlary, suratlarydyr çyzuw albomlary we beýleki harytlary alyjylara hödürleýärler. Mekdep bazarlarynda diňe okuwçylar däl, talyp ýaşlar üçin hem dürli görnüşli harytlaryň bardygy aýratyn bellenilmäge mynasypdyr. Bu ýerlerdäki ýokary hilli, bäsleşige ukyply, elýeterli bahalardaky ýaraşykly, zerur harytlaryň bolçulygam kalplary Berkarar döwletiň täze eýýamynyň Galkynyşy döwrüne bolan söýgi-buýsançdan doly alyjylaryň göwünlerini has belende göterýär. Şonuň ýaly-da müşderiler gerekli harytlary, okuw esbaplary bilen söwda merkezleriniň internet sahypalary arkaly tanyşyp, onlaýn dükanlaryndan sargytlar esasynda-da alyp bilýärler.
Ýeri gelende aýtsak, mekdep bazarlarynda, göçme söwda nokatlarynda alyjylara hödürlenýän harytlaryň öz ýurdumyzda öndürilendigini bellemelidiris. Munuň şeýledigine Türkmen döwlet neşirýat gullugynyň ýokary hil derejesinde taýýarlanan okuw esbaplary, neşir önümleri-de şaýatlyk edýär. Türkmenistanyň Senagatçylar we telekeçiler birleşmesiniň düzümindäki kärhanalaryň, şeýle-de döwletimiziň dokmadyr tikin kärhanalarynyň öndüren harytlary hem alyjylaryň ösen isleglerinden peýdalanýar.
– Täze, 2026-2027-nji okuw ýylynyň öňüsyrasynda guran mekdep bazarlarymyzda, göçme söwda nokatlarymyzda işler alyjylaryň ýokary islegleri esasynda alnyp barylýar. Mekdep esbaplarynyň, milli lybaslaryň, ähli zerur harytlaryň dürli görnüşleri raýatlarymyz tarapyndan uly hoşallyk bilen alynýar.
Häzirki wagtda sebitimiziň etraplardyr şäherlerinde degişli söwda nokatlarynyň 30-dan gowragy işläp, ilatymyza göwnejaý söwda hyzmatlaryny yzygiderli alyp barýarlar. Mekdep bazarlarymyz, göçme söwda nokatlarymyz hem öňümizdäki sentýabr aýynyň bäşine çenli öz işlerini dowam ederler.
Mümkinçilikden peýdalanyp, ösüp gelýän ýaş nesiller barada, halkymyz hakynda edýän irginsiz aladalary, döredip berýän giň mümkinçilikleri üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza egsilmez alkyşlarymyzy aýdýarys – diýip, Balkan welaýat Alyjylar jemgyýetleri birleşiginiň müdiriýetiniň bölüm ýolbaşçysy Mekan Şirmämmedow gürrüňdeş bolanymyzda aýtdy.
