Ýurdumyzyň Günbatar sebitini jähekläp oturan Balkan welaýatynda Halkara parahatçylyk we ynanyşmak ýylynda uludan toýlanylýan hemişelik Bitaraplygymyzyň şöhratly 30 ýyllyk baýramynyň hem-de Halkara Bitaraplyk gününiň dabaralarydyr göwün göteriji çäreleri çäksiz şatlyk-şowhuna, ruhy galkynyşa, aýratyn ähmiýete beslenýär. Goja Hazaryň kenaryndan başlanyp, welaýatyň çar künjegine uzaýan ümmülmez giňişlikde, taryhy özgertmeler mekanynda bu gün göwünleri heýjana salýan baýramçylyk joşguny höküm sürýär.
Balkan welaýat häkimliginiň, welaýat medeniýet müdirliginiň hem-de welaýatyň jemgyýetçilik guramalarynyň Balkanabat şäherindäki “Türkmeniň ak öýi” binasynda bilelikde guran dabarasy giňden ýaýbaňlandyryldy. Dabarada çykyş edenler oňa gatnaşyjylary hemişelik Bitaraplygymyzyň şöhratly 30 ýyllyk taryhy senesi we Halkara Bitaraplyk güni bilen mähirli gutladylar. Olar Halkara parahatçylyk we ynanyşmak ýylynyň dünýä jemgyýetçiliginiň ünsüni özüne çekýän tutumly dabaralara, şanly wakalara baý bolýandygyny nygtap, ähli ugurlar bilen birlikde medeniýet toplumyny ösdürmekde döwlet derejesinde nusgalyk tagallalary edýän Arkadagly Gahryman Serdarymyza tüýs ýürekden çykan alkyşlaryny, hoşallyklaryny beýan etdiler. Welaýatyň medeniýet we sungat ussatlarynyň ýerine ýetirmeklerinde belentden belent ýaňlanan döwrebap aýdym-sazlaryň hoş owazlary alyslara ýaň saldy. Bu ýerde Balkan welaýatynyň çar künjeginden gelen tanymal bagşy-sazandalaryň, ussat aýdymçylaryň, çeper höwesjeňleriň, talyp ýaşlaryň hem-de welaýatyň birleşen döredijilik toparlarynyň taýýarlan edebi-sazly çykyşlaram has-da täsirli, şowhunly boldy.
Buýsançly çykyşlarda Halkara parahatçylyk we ynanyşmak ýylynda ýurdumyzyň alyp barýan oňyn Bitaraplyk syýasatynyň, Berkarar döwletiň täze eýýamynyň Galkynyşy döwrüniň hem-de taryhy, şanly eýýamymyzda ýetilen ýokary sepgitleriň, gazanylan guwandyryjy üstünlikleriň, rysgal-bereketli, toýly ülkämiziň, şeýle-de hormatly Prezidentimiziň jöwher paýhasyndan nurlanan eziz Diýarymyzyň, dost-doganlygyň, parahatçylygyň waspy mynasyp beýanyny tapdy. Beýik Ýüpek ýolunyň çatrygynda ýerleşip, milletleri, yklymlary birleşdiren türkmen Diýarynyň şöhratly taryhynda ynsanperwerlige, sahawata ýugrulan mukaddes däp-dessurlarymyzdan gözbaş alýan folklor we tans toparlarynyň kalbyňy heýjana getiren joşgunly çykyşlary bagtyýar zamanamyzyň nurana keşbini aýdyň görkezdi. Çäksiz söýgä, egsilmez buýsanja eýe bolan dabaranyň uly şatlyk-şowhunam adamlara ruhy lezzet paýlady.
Şeýle baýramçylyk dabaralarynyň biri hem Balkan welaýat ýörite sungat mekdebi tarapyndan welaýat merkezi Balkanabat şäheriniň «Naýbaşy» toý dabaralar mekanynda geçirildi. “Bitaraplyk şöhratymyz-şanymyz” diýen at bilen guralan dabara jemgyýetçilik guramalarynyň wekilleri, bilim, medeniýet ulgamlarynyň, edaralardyr kärhanalaryň işgärleri ýokary işjeňlikde gatnaşdylar.
Baý mazmunda geçen dabaranyň dowamynda hormatly Prezidentimiziň parasatly içeri, daşary syýasatynyň eşretleri, olaryň bähbitli, hözirli netijeleri hakynda-da aýratyn durlup geçildi. Halkara parahatçylygy we ynanyşmagy pugtalandyrmagyň, bütin dünýäde agzybirligi, dost-doganlygy has-da berkitmegiň derwaýys ähmiýeti dogrusynda hem buýsançly söhbetler edildi. Soňra Balkan welaýat ýörite sungat mekdebiniň mugallymlarydyr talyplarynyň aýdym-sazly çykyşlaryna uly orun berildi. Dabaranyň dowamynda bu okuw mekdebiniň bagşy-sazandalary, estrada aýdymçylary, çeper höwesjeňleri, halk döredijilik, tans toparlary çykyş edip, dabara gatnaşyjylaryň galkynan göwünlerini arşa göterdiler. Baýramçylyk dabarasynda gürrüňi edilýän sungat mekdebiniň talyp ýaşlarynyň täjik, gazak, gyrgyz, özbek, arap, rumyn, italýan hem-de beýleki dost-doganlyk halklarynyň aýdym-sazlaryny, tanslaryny ýerine ýetirmeklerem dabaranyň täsirini, şatlyk-şowhunyny has-da artdyrdy. Dünýäniň dürli dillerinde ýaňlanan şowly çykyşlar tomaşaçylar tarapyndan dowamly, şowhunly el çarpyşmalar bilen garşylandy.
Halkara parahatçylyk we ynanyşmak ýylynda giňden bellenilýän hemişelik Bitaraplygymyzyň şöhratly 30 ýyllyk baýramynyň hem-de Halkara Bitaraplyk gününiň şanyna bagyşlanyp guralýan dürli täsirli dabaralardyr çäreler Günbatar sebitiň beýleki etrap-şäherlerinde hem guramaçylykly dowam edýär.
