Daşoguz welaýatynyň taryhy we ülkäni öwreniş muzeýinde Türkmenistanyň hemişelik Bitaraplygynyň 30 ýyllygyna bagyşlanan «Bitaraplyk – baky bagtyň binýady» atly sergi açyldy. Sergide ýerli suratkeşleriň ýagly boýag we grafik usulynda çeken suratlary, şeýle hem heýkeller we zergär önümleri goýlupdyr.

Milli ruhda ýerine ýetirilip, Watana bolan söýgüden doly ähli işler türkmen halkynyň özboluşly medeniýetini we taryhyny beýan edýär. Olaryň käbirleri, mysal üçin, Türkmenistanyň Döwlet çeperçilik akademiýasynyň zergärlik bölüminiň täze uçurymy Ç. Käbäýewanyň işleri ilkinji gezek görkezilýär. Onuň çeper elinden çykan zenan şaý-sepleri owadanlygy we ajaýyplygy, türkmen zergärleriniň gadymy senediniň inçe syrlarynyň ussatlarça ulanylmagy bilen özüne çekýär.

Ýerli suratkeşler G. Babaýewiň, R. Abdyllaýewiň, K. Töräýewiň, E. Kabulowyň grafik usulynda işleýän O. Şyhyýewanyň we başgalaryň işleri öz dogduk topragynyň gözelligine, taryhy şahsyýetleriň keşplerine we milli ruhy hem medeni gymmatlyklara bagyşlanýar.

Hemişe bolşy ýaly, Türkmenistanyň Suratkeşler birleşiginiň agzasy Baýgeldi Annamedow hakyky hereket täsirini döretmek bilen, öz heýkellerinde şol pursadyň duýgusal ýerligini doly beýan etmegiň hötdesinden gelipdir.

Işleriň ýordumlary türkmen halkynyň döredijilik durmuşyny, onuň parahatçylyga, dostluga, hoşniýetli goňşuçylyga we hyzmatdaşlyga bolan üýtgewsiz ymtylyşyny aýdyň görkezýär.