Eýran Yslam Respublikasynyň Aşgabatdaky ilçihanasynyň Medeniýet merkezinde Atalar güni mynasybetli dabaraly çäre geçirildi. Çärä Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehani, merkeziň pars dilini öwrenýän talyplary, mugallymlary, paýtagtymyzyň ýaşaýjylary, jemgyýetçilik hem-de köpçülikleýin habar beriş serişdeleriniň wekilleri gatnaşdylar.
Atalar güni Eýranyň milli baýramlarynyň biri bolup, ol Hezreti Alynyň doglan gününiň hormatyna esaslandyrylyp, däp boýunça maşgala baştutanyna hormat goýmagyň nyşany hökmünde bellenilýär.
Baýramçylygyň çäginde Eýranyň we Türkmenistanyň halklaryny birleşdirýän taryhy kökleriň we esasy gymmatlyklaryň umumylygy aýratyn bellenildi. Olaryň arasynda ata-enä hormat goýmak, nesilleriň dowamlylygy hem-de maşgala däplerini aýawly saklamak möhüm orun eýeleýär.
Baýramçylyk agşamynyň maksatnamasyna laýyklykda goşgular okaldy, gülküli sahna çykyşlary hem-de pars, türkmen, rus we iňlis dillerinde aýdymlar ýerine ýetirildi.
Baýramçylyk agşamynyň jemleýji böleginde baýramçylyga gatnaşan myhmanlaryna, hem-de Ali, Zöhre we Fatima atly tomaşaçylara ýadygärlik sowgatlary gowşuryldy.
Ilçi Ali Mojtaba Ruzbehani Türkmenistanyň Prezidenti Serdar Berdimuhamedowy, türkmen halkynyň Milli Lideri, Gahryman Arkadagymyzy hem-de ähli türkmen halkyny 2026-njy ̶ «Garaşsyz, baky Bitarap Türkmenistan – bedew batly at-myradyň mekany» ýyly bilen gutlady, hem-de Eýran Yslam Respublikasynyň Türkmenistandaky ilçihanasynyň Medeniýet merkezine çäräni ýokary derejede geçirendigi üçin hoşallyk bildirdi hem-de bu baýramyň ruhy ähmiýeti barada giňişleýin durup geçdi.
«Atalara hormat goýmak gadymy döwürlerden bäri Eýran bilen Türkmenistanyň halklarynyň arasynda bar bolan umumy ahlak we medeni gymmatlyklaryň biridir. Bir maşgalany bina hökmünde göz öňüne getirsek, ata onuň goldawy bolup durýandyr. Onuň barlygy maşgala agzalaryna ruhy kuwwatlylygy we ylham berýär. Kaka durmuş synaglaryna çydamly we öýde asudalygy saklaýan adam. Atanyň söýgüsi köplenç sözler bilen däl-de, hereketiň üsti bilen beýan edilýär.» – diýip, ilçi belledi.
Öz gezeginde, Eýran Yslam Respublikasynyň Türkmenistandaky ilçihanasynyň medeni meseleler boýunça geňeşçisi Abdolreza Abbasi Türkmenistanyň medeniýetinde hem kakanyň ornunyň we ähmiýetiniň örän möhümdigini nygtady. Onuň bellemegine görä, bu ýagdaý türkmen halkynyň milli däp-dessurlary bilen baglanyşykly bolup, ata-enä we ähli ýaşululara hormat goýmak iň esasy we iň hoşniýetli däpleriniň biridir.
