Türkmenistanyň Döwlet çeperçilik akademiýasynyň sergi zalynda «Bedew batly Watanym» atly şekillendiriş sungatynyň eserleriniň sergisi ýaýbaňlandyryldy. Sergi ýurdumyzyň şu ýyldaky «Garaşsyz, baky Bitarap Türkmenistan – bedew batly at-myradyň mekany» diýen şygary, şeýle hem her bir türkmenistanlynyň buýsanjyna öwrülen «Galkynyş» milli at üstündäki oýunlar toparynyň dünýä derejesindäki üstünlikleri bilen sazlaşykly utgaşýar.
Serginiň özboluşly aýratynlygy onda görkezilýän gymmatlyklaryň ählisi akademiýanyň Altyn gaznasyndan alnan eserlerdir. Mälim bolşy ýaly, Döwlet çeperçilik akademiýasynyň muzeýinde talyplaryň iň gowy işleri saklanýar. Ýokary okuw mekdebiniň Altyn gaznada öz işiniň ýer almagy islendik talyp üçin uly abraýdyr.
Sergi Gyzylgül Hudaýberdiýewanyň «Akhan» atly eseri bilen açylýar. Rowaýaty bedew Günüň altyn şöhleleriniň astynda çarpaýa galyp dur. Onuň bu buýsançly duruşy Watanymyzyň okgunly ösüşiniň nyşanydyr. Muny arkadaky çalymtyl ümeziň içinden görünýän şäherlerimiziň döwrebap binalary hem tassyklaýar.
Diwarlygyň garşy tarapynda Gyzylgülüň ýene bir eseri «Galkynyş» topary» atly suraty ýerleşdirilipdir. Awtor batyrgaýlygy bilen tomaşaçylary haýran galdyrýan türkmen ýigitleriniň sirkdäki çykyşynyň täsirli pursadyny ussatlyk bilen şekillendiripdir. Atlylaryň örän ýokary tizlikde çykyş edýändiklerine garamazdan, suratkeş olaryň ýüz keşplerini tanar ýaly derejede anyk beripdir.
Serginiň merkezinde Baýram Mämiýewiň «Toýda» diýen eseri ýerleşdirilipdir. Geň galaýmaly ýeri, suratda adaty toý kerweniniň ýa-da sahy saçakly toýuň deregine, uly hyjuw bilen barýan atlylar şekillendirilipdir. Suratkeş obadaky toýlaryň aýrylmaz böleginiň at çapyşygydygyny nygtamak isläpdir.
Dizaýnerlik işleriniň arasynda Aýgül Gurbanmyradowanyň «Watany wasp etmek» atly suraty aýratyn tapawutlanýar. Ak we gara reňkli iki sany ahalteke bedewi gündizi we gijäni, ýagny wagty alamatlandyrýar. Olar durmuşyň dürli öwüşginli reňkleriniň içinde çapyp barşyna dünýä gözellik we haýranlyk paýlaýarlar.
Leýli Çaryýewanyň «Tebigatda dynç alyş» atly suraty şadyýan ertiriň şatlygyny, howanyň dury arassalygyny, derýa boýunda balykçy bilen iki atlynyň dostlukly duşuşygyny beýan edýär. Leýli tebigatyň gözelligini has giňden görkezmek üçin esasy gahrymanlary suratyň sag tarapyna süýşüripdir. Asman, daglar we agaçlar suratda iki görnüşde – asylky we derýadaky görnüşlerinde görünýär.
Myrat Jumaýew «Türkmen atlary» atly suratynda ahalteke bedewini Watanymyzyň giňişliklerinde kemala gelen gözellik nusgasy hökmünde görkezipdir. Suratyň ikinji hatarda gadymyýetiň we häzirki zamanyň binalary görünýär. Munuň bilen suratkeş ahalteke bedewleriniň gözelligine bolan ebedi sarpany nygtady.
Her ýyl Döwlet çeperçilik akademiýasynyň Altyn gaznasy zehinli talyplaryň täze eserleri bilen baýlaşýar. Häzirki «Bedew batly Watanym» atly sergi bolsa tomaşaçylara dünýäniň iň owadan atlary bolan ahalteke bedewlere bagyşlanan dürli ýyllaryň talyp işleri, ýagny gaznanyň bir bölegi bilen tanyşmaga mümkinçilik berdi.
