Haly suratkeşi Şeker Hudaýberenowanyň 50 ýaşynyň dolmagy mynasybetli Türkmenistanyň Medeniýet ministrliginiň Şekillendiriş sungatynyň sergi merkezinde eserleriniň şahsy sergisi guraldy.
Sergi «Ussadyň elleri bilen döredilen gözellik» diýlip atlandyryldy. Şeker Hudaýberenowany gutlamaga gelen myhmanlary ajaýyp gobelen garşy aldy.
Serginiň merkezinde Şekeriň çeper elleri bilen dokalan haly ýerleşdirildi, halyda tagtda oturan Oguz hanyň şekili janlandyrylypdyr. Bu bolsa Şeker Hudaýberenowanyň Türkmenistanyň Döwlet çeperçilik akademiýasyny tamamlan wagtyndaky diplom işidir. Eser akademiýanyň Altyn gaznasyna girizildi. Halynyň ýüzündäki Oguz han ötgür nazary bilen öz nesillerine syn edýän ýaly dokalypdyr.
Şeker Lebap welaýatynyň Halaç etrabynda doguldy. Onuň çagalyk ýatlamalaryna görä, boş wagtlary ejesi haly dokaýardy, hünäri boýunça hasapçy bolan kakasy bolsa edebi gahrymanlaryň suratyny çekmegi gowy görýärdi. Şekere kakasynyň surat çekmek höwesi has ýakyndy. Mekdep ýyllarynda diwar gazetini taýýarlaýardy we ähli bezeg işleri boýunça mugallymlar diňe oňa ýüz tutýardylar. Emma, okuwa girmeli wagty, ol Türkmen döwlet çeperçilik mekdebiniň halyçylyk bölümini saýlady. Onuň mugallymy Anna Ataýewa okuwdan daşary Aşgabadyň haly fabrigine yzygiderli gatnaýan okuwçysyna örän guwanýardy. Halypa mugallym zehinli okuwçysyna okuwyny çeperçilik akademiýasynda dowam etdirmegi maslahat berdi. Şeker hem onuň maslahatyny diňläp, okuwyny dowam etdi. Akademiýanyň mugallymy Amanmyrat Ataýew hem birinji ýyl talybynyň adaty haly nusgalaryny gaýtalamagyň ýerine täze haly nusgalaryny döretmekdäki özboluşly ukybyny derrew gördi. Mugallym onuň bu başarnyklaryny ösdürmek üçin ähli mümkinçilikleri döretdi.
Şeker Hudaýberenowanyň ýubileý sergisi suratkeşiň gören zatlaryndan täze haly nagyşlaryny döretmek, şeýle hem reňk öwüşginlerini ussatlyk bilen utgaşdyrmak ukybyny doly görkezdi. Şeker eýýäm dokalan halylaryň we gobelenleriň köp sanly çyzgylaryny, şeýle hem öz wagtyna garaşyp duran täze taslamalaryny görkezdi. Eskizleriň arasynda «XXI – Altyn Asyr» atly iş aýratyn tapawutlanýar. Şeker tegelegiň içinde Türkmenistanyň Garaşsyzlyk binasyny şekillendirip, fon hökmünde XXI sanyny saýlap aldy we ony gönüburçlugyň içine ýerleşdirip, köp sanly şeýle şekillerden döwrebap nagyş döretdi.
Sergide görkezilen gobelenleriň biri hem «Daş gül» diýlip atlandyrylýar. Bu Köýtendagdaky meşhur Gülşirin gowagyndan alnan güldür. Haýsydyr bir gudrat bilen ol çuň gowaga düşüp, wagtyň geçmegi bilen daşa öwrülipdir. Şu günki günde daş gül seýrek duş gelýän muzeý gymmatlygydyr. Şeker bu güle täze jan berip, onuň şekilini gobelen sapaklary arkaly janlandyrdy.
Halylaryň arasynda tomaşaçylaryň ünsüni metjide, şol bir wagtyň özünde hem kejebä ýa-da şaý-seplere meňzeş gurluşly haly çekdi. Her bir tomaşaça bu şekiliň nämedigini öz islegine görä kesgitlemäge mümkinçilik berildi.
Sergide halylardan we gobelenlerden başga-da, Şekeriň okuw we iş döwründe döreden portretler galereýasy hem bar. Nurana ýylgyryşly körpeje oglanyň suraty hemmeleri özüne çekdi. Onuň gyz doganynyň portreti hem ünsden düşmedi. Oglanjykdan tapawutlylykda, gyzjagaz öz ýaşyna görä örän agras we bilesigeliji görünýär. Portretler fotorealizm usulynda çekildi.
Häzirki wagtda Şeker halyçylyk sungatynyň syrlaryny Aşgabat şäher Medeniýet müdirliginiň Bäşim Nuraly adyndaky Çagalar çeperçilik mekdebiniň okuwçylaryna öwredýär. Onuň 37 sany okuwçysy bar, olar her bir işinde öz halypasyna meňzejek bolýarlar.
– Halyçylyk we gobelençilik sungaty uly sabyrlylygy we ünslüligi talap edýär, bu bolsa häzirki wagtda tehnologiýalaryň ösen döwründe çagalaryň häsiýetine laýyk gelmeýär — diýip, Şeker belleýär. — Şonuň üçin hem men gyzlaryň halyçylyk sungatyny öwrenmäge bolan höwesine uly hormat goýýaryn. Men öz tejribämi, zähmetsöýerligimi we şowly eser döreden döredijiniň şatlygyny olara ýetirmek isleýärin.
