«Watan» kinokonsert zalynda «Saz – kinonyň jany» atly konsert boldy. Onda Röwşen Nepesowyň orkestriniň sazandalary aşgabatly tomaşaçylary we paýtagtymyzyň myhmanlaryny ýene-de türk teleseriallaryndan ajaýyp sazlar bilen begendirdiler.
Bu filmleriň özboluşly aýratynlygy bar: olar häzirki zaman durmuş meseleleriniň çözgütlerini açyp görkezýärler. Maşgala gatnaşyklary bolsun ýa söýgi pelsepesi, gahrymanlaryň duýgularynyň aýdyň beýany kino söýüjileriň kalbynda çynlakaý şäriklik duýgusyny tapýar we bagtly hem pajygaly ýagdaýlarda duýga ýugrulan sazlaşykly saz bezegi ýüze çykýar.
Röwşen Nepesowyň orkestriniň türk teleseriallarynyň sazlaryndan düzülen konserti tomaşaçylara orkestr sazandalarynyň ylhamly çykyşlaryndan lezzet alyp, söýgüli gahrymanlarynyň joşgunly duýgularyny täzeden başdan geçirmek mümkinçiligini bagyş edýär. Şol agşam tomaşaçylaryň gözüniň öňünde «Gadagan söýgi», «Maşgala», «Ajaýyp asyr», «Çimçyk», «Hercai», «Betbagt söýgi» we beýleki teleseriallardaky tanyş hekaýatlardan parçalar janlandy. Tomaşaçylaryň gözüniň öňünde ekranda hormat we borç, söýgi we gabanjaňlyk, zalymlyk we asyllylyk ýaly häsiýetleri beýan edýän dramalar peýda boldy. Bu duýgulary janly orkestriň ýerine ýetirýän sazlary has-da güýçlendirip, sazyň kinonyň ruhudygyny subut etdi.
Tomaşaçylaryň el çarpyşmalary astynda konsert «Kärende söýgi» teleserialyndan şadyýan we depginli saz bilen tamamlandy. Konsertiň aýdymçysy, Türkmenistanyň at gazanan artisti Selbi Annadurdyýewa sahna arkasynda çykyş etdi. Wokalçynyň sesi eşidilýän, ýöne özi görünmeýän bu ýagdaý filmiň sazy bilen has gowy laýyk gelmegi üçin amal edildi. Orkestre Eziz Jumanyýazow dirižýorlyk etdi, konserti Türkmenistanyň at gazanan artisti Röwşen Nepesow alyp bardy.
– Türk teleseriallaryndan sazlaryny ýerine ýetirmek bilen – diýip, Röwşen Nepesow konsertden soň geçiren söhbetdeşliginde aýtdy – men tomaşaçylara diňe bir söýgüli gahrymanlary bilen duşuşmagyň lezzetini bermek bilen çäklenmän, eýsem türk kompozitorlarynyň, ýagny Toýgar Yşyklynyň, Çaglar Haznedaroglunyň, Sertaç Özgümüşiň we başgalaryň ajaýyp eserleri baradaky bilimlerini artdyrmak, şeýle hem aýdym-sazyň, hakykatdanam, kinonyň janydygyna hemmeleri ýene-de bir gezek ynandyrmak isleýärin!»
