Ýakynda Maýa Kulyýewa adyndaky Türkmen milli konserwatoriýasynda iň gözel gyz talybyny saýlamak boýunça «Talyp gözeli» atly bäsleşik geçirildi. Oňa, ýeňiji diýen ada dalaşgär hökmünde dört fakultetiň hersinden bir talyp gyz gatnaşdy. Ýöne talyp gözeli diýmek nämäni aňladýar? Bu, elbetde, ilkinji nobatda dalaşgäriň daşky keşbini we özüne çekijiligini, şeýle hem onuň saýlan hünäri boýunça ukybyny, amaly-haşam sungatyna we aşpezlige bolan başarnygyny aňladýar.
«Öz hünäriň arkaly Watany we Gahryman Arkadagy wasp etmek» diýip atlandyrylan bäsleşigiň birinji tapgyrynda, halk saz gurallary fakultetiniň birinji ýyl talyby Bägül Döwletmyradowa öňe saýlandy. Ol dutarda sazy ýerine ýetirmekde we aýdym aýtmakda garşydaşlaryndan ýokary baha alyp, öňe çykmaga mümkinçilik gazandy. Emma beýleki gyzlar ruhdan düşmediler, sebäbi öňde ýene iki tapgyr bardy.
Türkmen milli keşdesi halkymyzyň buýsanjydyr. Bäsleşigiň ikinji tapgyry bolsa gyzlaryň iňňe-sapak bilen işlemekdäki ukyplaryny görkezdi. Emma gysga wagtyň dowamynda önümi doly taýýarlap bolmaýar, şonuň üçin olara «ýaka» görnüşindäki keşdäniň kiçi bölegini ýerine ýetirmek tabşyryldy. Bu tapgyrda kompozisiýa, saz teoriýasy we fortepiano fakultetiniň ikinji ýyl talyby Laçyn Ataýewa ýeňiji boldy.
Öňde iň soňky we çözgütli tapgyr bardy. Eger gyz unaş taýýarlap bilmeýän bolsa, ondan nähili gözel bolar? Şeýdip, «Talyp gözeli – 2026» adyna dalaşgärler hamyry ýaýmaga girişdiler. Olaryň işine diňe eminler däl, eýsem kursdaşlary hem üns bilen syn etdiler. Ýokary okuw jaýynyň kiçi zalynda dartgynly ýagdaý emele geldi. Hemmeleri bir sowal gyzyklandyrýardy: «Bu gezek bagt kimiň tarapynda bolarka?». Bagt ýene-de Bägül Döwletmyradowanyň tarapyndady – ol öňünde goýlan wezipäni has çalt we ýokary hilli ýerine ýetirdi.
Eminler topary – jemgyýeti öwreniş kafedrasynyň uly mugallymy Gülşirin Otuzowa, estrada sungaty kafedrasynyň müdiri Maýsa Mämmetjumaýewa we kitaphananyň müdiri Maral Nuryýewa – şeýle netijä geldiler: şol ýokary okuw mekdebiniň «Talyp gözeli – 2026» adyna Bägül Döwletmyradowa mynasyp boldy.
– Bu ada mynasyp bolmak meniň üçin uly mertebedir. Bu waka meniň özüme, ene-atam we fakultetimiz üçin ajaýyp sowgat boldy. Öňde ýurdumyzyň ýokary okuw mekdepleriniň arasynda geçiriljek «Talyp gözeli – 2026» atly bäsleşigi bar. Elbetde, ol ýerde hem ýeňiş gazanyp, konserwatoriýamyzyň talyplaryna has-da buýsanç getirmek isleýärin, diýip, Bägül şatlygyny paýlaşdy.
