Ýurdumyzyň Döwlet çeperçilik akademiýasynda Türkmenistanyň halk suratkeşi Kakageldi Gurbangeldiýewiň doglan gününiň 70 ýyllygy mynasybetli şahsy sergisi açyldy. Suratkeş onda 170 surat goýdy – olaryň hemmesi-de oba hakynda.
Onuň dünýä inip, önüp-ösen ýeri bolan Mary welaýatynyň Täze oba obasy suratkeşiň dünýäsi, älemi ýaly täsir döredýär. Şonuň üçin-de ol her suratda çagalygyna – gaýgysyz, bagtyýar dünýä düşýär. Ol deň-duşlary bilen hezil edip top oýnaýar, taýagy gylyç edinip, gaýduwsyz göreşýär we beýleki çaga oýunlaryndan lezzet alyp, wagtyny hoş geçirýär.
Kakageldi Gurbangeldiýewiň özüne mahsus uslyby bar; onuň işlerini beýleki suratkeşleriň işleri bilen garyşdyrmak mümkin däl. Olar bezeg üçin çekilen, özleri-de, esasan bir reňkli. Suratkeş kendiriň ýüzüne galyň astar gatlagyny ýazmaýar, şonuň üçin-de käwagtlar onuň suratlarynda kendiriň gülleri-de görünýär, ýöne bu onuň işine goşmaça artykmaçlyk getirýär. Ol öz işlerine at goýman, ýöne iki esasy topara bölýär: çagalyk mowzugy we obanyň gözel görnüşleri. Onuň işleriniň ujypsyzja başga bir bölegi abstrakt uslypda ýerine ýetirilen kompozisiýalardan ybarat.
Suratkeşiň özüne mahsus uslyby – üýtgewsiz garaýşy nazarlaýan göni görnüş we tempera bilen işleme – ol heniz Türkmen döwlet ýörite çeperçilik mekdebinde okaýarka ýüze çykypdy. Moskwanyň W.I.Surikow adyndaky döwlet çeperçilik institutyna girende, Kakageldi Gurbangeldiýew öz uslybyny üýtgetmeli bolar öýdüp alada etdi. Ýöne onuň mugallymy, professor Taýyr Teýmurowiç Salakow munuň tersine, oňa saýlan ugrunda kämilleşmegi maslahat berdi.
1982-nji ýylda abraýly uniwersitetiň uçurymyny çeperçilik mekdebine mugallymçylyga çagyrdylar. Şu ýerde-de ol Türkmenistanyň at gazanan suratkeşi diýen ada mynasyp boldy. Kakageldi Gurbangeldiýew 10 ýyldan gowrak öz bilimini we tejribesini geljekki suratkeşlere öwretdi, soňra Türkmenistanyň Döwlet çeperçilik akademiýasyna mugallym bolup geçdi. 2015-nji ýylda surat çekme sungatyna goşan uly goşandy üçin Kakageldi Gurbangeldiýewe Türkmenistanyň halk suratkeşi diýen at berildi.
Mugallymlyk işiniň döredijiligine päsgel bermezligi üçin Kakageldi Gurbangeldiýew iş gününi ikä bölüp başlady. Ol günüň birinji ýarymyny talyplar bilen geçirýärdi, ikinji ýarymyny bolsa ussahanasynda işleýärdi. Diplomy boýunça ol ýadygärlikçi suratkeş, ýöne sergide kiçi göwrümli suratlar görkezilipdir. Suratkeş muny islendik suratdan, hatda kükürt gutusy ýaly kiçi suratdan-da aňsatlyk bilen ýadygärlik eserini döredip bolýandygyny we tersine-de edip bolýandygyny aýtmak bilen düşündirýär.
Onuň ussahanasynda uly suratlar-da köp, şonuň üçin ol suratçy-žurnalist Alekseý Gimalitdinow ikimizi özümiz üçin amatly bolan islendik wagtda ussahanasyny görmäge çagyrdy. Mümkin, biz suratkeşiň çakylygyny kabul edip, bir gün onuň uly işleri bilen tanşarys. Ýöne bu, zehinli suratkeşiň köpugurly döredijiligi barada başga bir mowzuk bolar.
