Däp boýunça Halkara zenanlar güni bolan 8-nji martda Türkmenistanyň Medeniýet ministrliginiň Şekillendiriş sungaty sergi merkezinde diňe zenan işleriniň sergisi geçirilýär. Bu ýylky sergide merkeziň iki gatyny-da eýeleýän suratlar, heýkeller, şaý-sepler we amaly bezeg sungatyna degişli işler görkezilýär. Serginiň tapawutly aýratynlygy, onda 90 ýaşyndaky iki suratkeşiň: hünäri suratkeş Tamara Kiselýowanyň we höwesjeň suratkeş Ýustinýa Kurilonyň gatnaşmagydyr.
Tamara Kiselýowa öz işlerini sergide köp görkezýär, olaryň arasynda «Ak şäherim Aşgabat» suraty aýratyn ýatda galyjydyr. Ýustinýa Kurilo üçin bu sergi ilkinji synanyşykdyr. Ýaşdaşlar ilkinji bahar baýramy mowzugyny açyp görkezmek bilen, «Bahar», «Nergizler», «Erik gülleýär» we «Nar agajy» suratlaryny görkezdiler. Bu ýagdaý döredijilik höwesine ýaşyň böwet däldigini görkezýär.
Aýna Adinowa «Milana» atly gyzykly surat görkezdi. Ol dokuz suratda gyzynyň kämillik ýaşyna ýetişi barada gürrüň berdi. Hekaýat liriki we örän mähirlidi. Täçjemal Gylyçdurdyýewa «Aşyklar» işinde kubizm uslybynda birek-birege duýgy besleýän ýigitdir gyzy suratlandyrypdyr. Täçjemalyň öz işinde türkmen halysynyň käbir elementlerini ulanmagy bellenmäge mynasypdyr, çünki bu surata döredijilikli häsiýet beripdir.
Eýsem-de bolsa, iň manyly surat Gülşen Rejebowanyň «Dost-doganlyk ülkesi» suraty bolsa gerek. Gülşen bagtly zenanlary – Merkezi Aziýa ýurtlarynyň ählisiniň wekillerini elleri ägirt uly gül desseli çekipdir. Bu ajaýyp suratda Halkara zenanlar gününiň mowzugy öz beýanyny tapypdyr we parahatlyk bolmazdan, bagtyň bolup bilmejekdigini ýatladýan parahatlyk söýüji äheň ýaňlanýar.
Hatyja Amansähedowanyň «Mosart» suraty sergä gelýänlerde ägirt uly täsir galdyrýar. Hatyja ony salyhatly we ajaýyp uslypda ýerine ýetiripdir. Bir gyz dünýäni unudyp Mosart hakynda kitap okap otyr, penjireden bolsa ýokarda, elektrik simleriniň üstünde, saz partiturasyna meňzäp oturan guşlar görünýär, ýagny gyzyň gulagynda ajaýyp kompozitoryň jadyly mukamy ýaňlanýar.
Dina Ýewdokimowanyň «Durna maşgalasy» atly suratyny tomaşaçylar gyzykly erteki üçin çekilen surat hökmünde kabul etdiler. Owadan aýal-erkek guşlar höwürtgelerinde tizden çaga çykjak ýumurtgalaryň üstünde jürküldeşýärler. Bu olaryň guş durmuşyndaky iň bagtly pursatlar bolsa gerek. Maýa Jumaýewa «Üzüm salkymy» suratynda miweleri şeýle bir datly suratlandyrypdyr welin, olary dadyp göresiň gelýär. Ol öz işini zatlary ep-esli ulaltmak bilen, fotorealizm uslybynda çekipdir.
Hemişe bolşy ýaly, Dilber Omarowa tomaşaçylary keramika işleri bilen begendirdi, ol sergide owadanja terrakota heýkeljiklerden ybarat «Gelinler» atly toplumy görkezdi.
Türkmenistanyň Suratkeşler birleşigi, Türkmenistanyň Magtymguly adyndaky Ýaşlar guramasy we Türkmenistanyň Kärdeşler arkalaşyklarynyň Milli merkezi iň gowy görlen işleriň awtorlaryny ýadygärlik sowgatlar bilen sylagladylar.
