Magtymguly adyndaky milli sazly drama teatrynyň döredijilik topary täze sahnalaşdyrylan spektakllaryň ilkinji görkezilişiniň üçgünlüginiň çäginde ahalteke bedewine bagyşlanan täze sahna oýnuny görkezdi. Sahna ussatlary Türkmenistanyň halk ýazyjysy, dramaturg Gowşutgeldi Daňatarowyň pýesasy esasynda goýlan «Atdyr ýigidiň myrady» atly spektakl bilen çykyş etdiler.

Hemme zat Balybegiň Göroglynyň güýjüniň onuň Gyrat atly aty bilen baglanyşyklydygyny eşitmeginden başlandy. Balybeg rahatlygyny ýitirýär we mekirlik bilen şol ata eýe bolmagy ýüregine düwýär. Emma onuň ýakynlary Görogly ýaly batyrdan aty nädip ogurlamalydygyny bilmeýärler. Bu işi bir garry kempir öz üstüne alýar, ýöne Balybeg 50 ýyl onuň hyzmatynyň öwezini dolmak şerti bilen. Garry kempir özüni ejiz edip görkezýär we Göroglydan kömek soraýar. Görogly ony öýüne çagyrýar, emma ertesi gün kempiriň hem, Gyratyň hem ýokdugyny görýär.

– Garyp garry kempire rehim edip, ony öýümize çagyryp, ýalňyşdyňyz. Siziň wepaly atyňyzy şol ogurlady – diýip, Agaýunus adamsyna igenip, kömek etmegi teklip edýär.

– Atymy özüm ýitirdim, özüm hem taparyn – diýip, Görogly jogap berip, Balybegiň köşgüne ugraýar. Balybeg myhmany hormat bilen garşy alýar, ýöne atyny yzyna gaýtarmak baradaky haýyşyna: «Beýle ajaýyp aty almak isleýän köp bolar, ilki onuň seniňkidigini subut et» – diýip, jogap berýär. Görogly baý geýim geýende, at eýesini tanamaýar. Balybeg ýeňiş gazanan ýalydy. Emma şol wagt Görogly dutar getirmegi haýyş edýär. Ol dutaryň owazy bilen: «Türkmen aty bolmazdan nädip ýaşap biler?!» diýip aýdym aýdýar. Gyrat eýesiniň sesini eşidip, aýdymyň tanyş sözlerini ýatlap, onuň çagyryşyna jogap berýär.

Bu meşhur «Görogly» eposynyň sahnalaşdyrylan bölümine režissýor Myrat Aradow ýolbaşçylyk etdi. Ol žurnalistlere şeýle gürrüň berdi:

– Bu spektakly goýmak maňa tomaşaçylary sahna ussatlary bilen bilelikde gatnaşyga çekmäge mümkinçilik berdi. Teatr – bu janly organizm. Eger tomaşaçy bir zat halamasa, ol teatrdan ýüz öwrer. Tomaşaçy aktýor bilen bir howadan dem almaly, pýesanyň gahrymanlary bilen bir duýgyny paýlaşmaly. Diňe şonda biz gowy netijeleri gazanarys.

Spektakl üçin aktýorlaryň dogry saýlanylyşy hem möhüm ähmiýete eýe. Göroglynyň keşbine biz Baýramhan Gaýyrowy saýladyk – ol güýçli bedenli, görmegeý, pes we erkana erkek sesli aktýor. Daşky keşbi boýunça edil Göroglynyň özi! Synag hökmünde garry jadygöýiň keşbine bolsa Gunça Çommyýewany saýladyk. Teatrymyzda bu keşbe laýyk ýaşdaky zehinli aktrisalar köpdi, emma biz ýaş aktrisany saýlap, täzelik girizmegi makul bildik.

Spektaklymyzyň ýene bir aýratynlygy bar: şuňa meňzeş sahna eserini Alp Arslan adyndaky milli drama teatrynyň döredijilik topary hem sahnalaşdyrdy. Iki dürli döredijilik toparynyň bir eseri dürli görnüşde sahnalaşdyrmagy hemişe gyzyklydyr.