Ýokary liganyň toparlarynyň arasynda geçirilýän futbol boýunça Türkmenistanyň çempionatynyň 6-njy tapgyry Aşgabatda we Maryda geçirilen duşuşyklaryň ikisi bilen başlandy.
Birinji duşuşyk Maryda tamamlandy, ol ýerde «Merw» topary ýaryş sanawynyň soňky orunlarda barýan paýtagtyň «Köpetdag» toparyny kabul etdi.
Oýun dartgynly geçdi. Duşuşygyň ikinji ýarymyna çenli garşydaşlar birek-biregiň derwezesine bir pökgi geçirdiler. Guwanç Berdimyradowyň tora girizen (32-nji minut) pökgüsine myhmanlar Batyr Aşyrowyň dürs urgusy (47-nji minut) bilen jogap berdiler. Duşuşygyň ykbalyny çözen pursat oýnuň esasy wagtyna goşulan wagtda, 95-nji minutda Guwanç Berdimyradowyň ikinji pökgüsini tora salanda döredi we «Merw» 2:1 hasabynda ýeňiş gazandy. Bu pökgi G.Berdimyradowyň çempionatyň başyndan bäri duşuşyklarda tora girizen üçünji pökgüsi boldy.
Şu ýeňşinden soň Rahmanguly Baýlyýewiň türgenleri 10 utuk bilen üçünji orunda barýan, bir duşuşygy az geçiren «Altyn asyr» toparynyň yzyndan ýetdi.
Beýleki duşuşyk «Aşgabat» köpugurly stadionyň merkezi meýdançasynda geçirilip, onda «Ahal» we «Nebitçi» toparlary duşuşdy. Bu oýunda hem duşuşygyň ykbaly esasy wagta goşulan wagtda çözüldi. 98-nji minutda «Ahal» toparynyň hüjümçisi Süleýman Mirzoýew 11 metrlik jerime urgyny ýerine ýetirdi. Bu jerime urgusy myhmanlaryň goragçysy Begmyrat Arbatowyň pökgini el bilen oýnandygy üçin berildi. Bu pursata çenli bolsa, 90-njy minutda jerime urgusy bellenen nokatdan Ýakupmuhammet Gowşudowyň uran urgusyndan soň, «Nebitçi» toparynyň derwezesini pökginiň tora girmeginden derwezäniň ýokary kese sütüni halas etdi.
«Ahal» topary 1:0 hasabynda ýeňip, 11 utuk toplamak bilen ikinji orna çykdy, ýöne ol 15 utuk bilen öňdäki orunda barýan «Arkadag» toparyndan hem-de üçünji orunda 10 utukly «Altyn asyr» toparyndan bir duşuşyk köp geçirdi. Hüjümçi Süleýman Mirzoýewiň şu duşuşykdan soň, geçiren pökgüleriniň sany 4 boldy. Şu görkeziji bilen ol hüjümçileriň bäsleşiginde Mekan Aşyrow («Altyn asyr») we Didar Durdyýew («Arkadag») bilen 2 – 4 orunlary paýlaşýar. Şu bäsleşikde derwezelere 5 pökgi geçiren (2-si 11 metrlik jerime urgudan) «Şagadam» toparynyň futbolçysy Serdar Gulyýew öňde barýar.
Futbol boýunça Türkmenistanyň çempionatynyň 6-njy tapgyry «Arkadag» – «Aşgabat» we «Altyn asyr» – «Şagadam» toparlarynyň duşuşyklary bilen tamamlanar.
