Türkmen döwlet sirkiniň sungat işgärleri paýtagtymyzyň ýaşaýjylaryna we myhmanlaryna täze sirk çykyşlaryny taýýarlady. Bu bolsa çagalar hem ulular üçin maý sowgatlaryndan biri boldy.
Çykyşlar «Türkmen äheňleri» orkestriň ýerine ýetiren uwertýurasy bilen başlandy. Sirkiň arenasynda çykyşa gatnaşyjylaryň dabaraly ýörişi üçin kompozisiýa ýaňlandy. Bu çykyşyň tomaşaçylary sirkiň artistleri bilen tanyşdyrýan möhüm bölegidir.
Sirk sungatynyň däbine görä çykyşyň başy howa gimnastikaçysy Aýlar Bebilowanyň çykyşyndan başlandy. Gorkusyz akrobatyň sirkiň gümmezi astynda halkadaky oýun tärleri tomaşaçylaryň ähli ünsüni özüne çekdi.
Ýöne iki sany ulagda maýmynjyk sirkiň arenasyna gireninden soňra dartgynly tomaşa üýtgedi. Bu çykyş «Restoranda agşamlyk nahary» diýip atlandyryldy. Ýubkaly üç sany maýmynjyk stoluň başyna geçip oturýar, beýleki iki sany balakly maýmynjyk bolsa olara hyzmat edýär.
Soňraky masgarabaz oýny bolsa has-da gyzyklydy. Arena toreador eşigini geýinen eli gamçyly Pena Myratdurdyýew (kiçijik masgarabaz) çykdy. Ol Jorj Bizeniň «Karmen» operasyndaky «Toreador ýörüşi» sazynda buýsanç bilen tomaşaçylaryň öňünde baş egip öz oýunyna başlady. Ýöne arena çykan ýasama öküz toreadory şeýle gorkuzdy welin ol münbere tarap ylgap tomaşaçylaryň biriniň arkasynda gizlendi. Bu gysga çykyş örän gülkünç boldy.
Ýene-de ýüp üstündäki ekwilibristika dartgynly tomaşa döretdi. Arslan Kuraýew maňlaýynda syryk bilen tomaşaçylaryň öňüne çykdy. Çapyp barýan atyň üstünde dürli maşklar bilen arena Kerim Annamyradow, Elnar Muturzaýewa we sirkiň iň ýaş artisti – 4 ýaşly Ramazan Akmyradow dagy çykdylar. Arslan Kuraýew uly güýç sarp edip syrygy sazlaýardy. Çapyp barýan atyň üstündäki ussatlarymyzdan hem sazlaşykly hereket we edermenlik talap edilýärdi. Tomaşaçylar şeýle howply hereketleri gaýduwsyzlyk bilen ýerine ýetirýän artistlere haýran galyp seredýärdiler. Ekwilibristleriň her biriniň gözünde şeýle tolgundyryjy hereketlerden soňra buýsanç we şatlyk görünýärdi.
Owadanja pudellere tälim beriji Elmira we Samira Goşaýewalaryň çykyşyndan soňra gimnastikaçylaryň, akrobatlaryň, žonglýorlaryň çeýeligi, çalasynlygy we deňagramlylygy talap edýän täsirli çykyşlary başlady. Şeýle häsiýetlere eýe bolan çykyşlary üç gimnastikaçy ýerine ýetirdi. Olar - şol bir wagtda elleri we aýaklary bilen «Kauçuk» çykyşyny ýerine ýetiren Anastasiýa Gawrikowa, şeýle-de adamlary saltonyň ähli görnüşleri bilen haýrana goýan «Galkynyş» akrobat toparynyň artistleridir. Bu sahnalaryň arasynda masgarabazlar Pena Myratdurdyýewiň we Ezber Ataberdiýewiň bilelikdäki çykyşy hem bardy. Bu ýerde örän köp duýgular garyşypdy, bu çykyş bilen tamamlap hem bolardy, emma tomaşaçylara indiki at bilen bagly çykyş garaşýardy. Köp adamlar üçin ol sirk meýilnamasynyň esasy sahnasy bolup durýardy.
Orkestriň ýerine ýetirmeginde türkmen halk aýdymy «Awçy mukamy» bilen «Galkynyş» milli at üstündäki oýunlar toparynyň ýigitleri Türkmenistanyň at gazanan atşynasy Serdar Pygyýewiň ýolbaşçylygynda arenada çykyş etdiler. Meşhur toparyň çykyşy ýene-de ahalteke bedewleriniň gözelliginden lezzet almaga, tälim bermek sungatyna haýran galmaga we çalasyn we ýürekli ýigitleri garşy almaga mümkinçilik berýär. Çapyksuwar bilen atyň bile ýüpden bökmegi üýtgeşik tomaşa döretdi. Serdar Pygyýew şol böküşini gaýtalap ýatdan çykmajak pursat döretdi. Çykyşyň başyny başlan Aýlar Bebilowa «Zenanyň aýlawy» atly çykyşy ýerine ýetirýär, Lilianna Annaýewa dogumlylyk bilen at üstünde dürli tarapa reňkli ýaglyklar seçdi, soňra bolsa şol hereketleri bilen olary yzyna çöpledi.
Ýigitler her ädimde geň galdyrýardylar. Gözi daňylgy atyň boýnuna aşmak, bir atyň üstünde iki şem we Serdar Pygyýewiň elinde Türkmenistanyň Döwlet baýdagy bilen at üstünde üçleýin piramida çykyşy üýtgeşik pursatlaryň biri boldy. Bu çykyş tomaşaçylaryň gözünde ýigitleriň Watana bolan söýgüsini oýardy. Şeýlelikde owadan ahalteke bedewleri, başarjaň ýigitler we dünýäde deňi-taýy bolmadyk bedewlerimiziň Watany –Türkmenistan döwletimizi wasp edýän bu çykyşlar tomaşaçylarda ýatdan çykmajak pursatlar galdyrdy.
