Mukaddes Garaşsyzlygymyzyň şanly 35 ýyllyk taryhy senesiniň uludan toýlanyljak «Garaşsyz, baky Bitarap Türkmenistan – bedew batly at-myradyň mekany» ýyly kalplarymyza unudylmajak röwşenlik nuruny çaýyp, hakydalara hemişelik ýazylýar. Şanly ýylymyzyň arka atylýan her bir güni ýatdan çykmajak ajaýyp dabaralara, täsirli baýramçylyk çärelerine ulaşýar.
Şu günlerde bolsa giň gerimde ýaýbaňlandyrylýan Türkmenistanyň Konstitusiýasynyň we Döwlet baýdagynyň gününiň dabaralary ýurdumyzyň Günbatar sebitini jähekläp oturan Balkan welaýatynyň çar künjeginde hem belentden tutulýar. Welaýatyň ähli etraplarydyr şäherlerini gurşap alan toý-baýramçylyk çärelerinde Berkarar döwletiň täze eýýamynyň Galkynyşy döwrüniň taýsyz eşretleriniň, ýurt abadançylygynyň, halkymyzyň bagtyýarlygynyň hem-de Baş Kanunymyzyň we Döwlet baýdagymyzyň waspy aýdyň beýanyny tapýar.
Şeýle dabaralaryň biri welaýat merkezi Balkanabat şäherindäki Baş baýdak meýdançasynda geçirildi. Türkmenistanyň Magtymguly adyndaky Ýaşlar guramasynyň Balkan welaýat geňeşiniň, welaýat medeniýet müdirliginiň hem-de Türkmenistanyň Zenanlar birleşiginiň welaýat bölüminiň, beýleki jemgyýetçilik guramalarynyň bilelikde guran bu aýdym-sazly dabarasy bimöçber şatlyk-şowhuna, egsilmez joşguna, aýratyn ähmiýete beslendi. Belentden tutulan dabara welaýat merkezindäki ýokary we orta hünär okuw mekdepleriniň talyp ýaşlary, jemgyýetçilik guramalarynyň işjeň agzalary gatnaşdylar.
Çäksiz söýgä, egsilmez buýsanja eýe bolan dabarada türkmen halkynyň Milli Lideri Gahryman Arkadagymyzyň we hormatly Prezidentimiz Arkadagly Gahryman Serdarymyzyň ýadawsyz tagallalary netijesinde «Garaşsyz, baky Bitarap Türkmenistan – bedew batly at-myradyň mekany» ýylynda ýurdumyzyň halkara giňişligindäki barha artýan at-abraýydyr şan-şöhraty, günsaýyn dowamat tapýan täze-täze rowaçlyklar, gazanylýan nusgalyk üstünlikler dogrusynda buýsançly bellenip geçildi. Şeýle-de taryhy eýýamymyzyň beýik ösüşlerinden ruhlanan talyp ýaşlar Gahryman Arkadagymyza hem-de Arkadagly Gahryman Serdarymyza egsilmez alkyş, hoşallyk sözlerini beýan etdiler.
Welaýatyň medeniýet we sungat işgärleriniň, teatr ussatlarynyň, talyp ýaşlarynyň uly joşgunda ýerine ýetiren aýdym-sazlary-da dabara gatnaşyjylaryň şatlyk-şowhunyny arşa göterdi. Buýsançly çykyşlarda hormatly döwlet Baştutanymyzyň paýhasyndan nurlanan toýly ülkämiziň, Türkmenistanyň Konstitusiýasynyň we Döwlet baýdagynyň gününiň, dost-doganlygyň, parahatçylygyň tarypy ýetirildi. Berkarar Watanymyzyň şöhratly taryhynda sahawata ýugrulan mukaddes däp-dessurlarymyzdan gözbaş alýan folklor we tans toparlarynyň kalplary heýjana getiren şowhunly çykyşlary täze taryhy döwrümiziň «Garaşsyz, baky Bitarap Türkmenistan – bedew batly at-myradyň mekany» ýylynyň bagtyýar keşbini aýdyň şöhlelendirdi. Şonuň ýaly-da birleşen döredijilik toparlarynyň baý mazmundaky edebi-sazly çykyşlary dabara gatnaşanlar tarapyndan dowamly el çarpyşmalar bilen alkyşlanyldy.
– Türkmenistanyň Konstitusiýasynyň we Döwlet baýdagynyň gününe bagyşlanan dabaralar welaýatymyzyň etrap-şäherlerinde hem guramaçylykly dowam edýär. Dürli derejeli dabaralardyr çäreler, maslahatlar, duşuşyklar, bäsleşikler, sergiler diňe bir durmuş-terbiýeçilik ähmiýetini özünde jemlemek bilen çäklenmän, eýsem, ýaşlaryň kalbynda ýagşydan ýagşy arzuw-islegleriň hasyl bolýan jenneti mekanyna, Berkarar döwletiň täze eýýamynyň Galkynyşy döwrüne söýgi-buýsanjy, wepalylygy has-da ýokarlandyrýar. Şeýle-de okamak, öwrenmek, zähmet çekmek, döretmek, gurmak bagtyna mynasyp bolan ýaşlarymyz döredip berilýän nusgalyk şertlerdir mümkinçilikler üçin Gahryman Arkadagymyza hem-de Arkadagly Gahryman Serdarymyza özleriniň çäksiz ýürek buýsançlaryny beýan edýärler – diýip, Türkmenistanyň Magtymguly adyndaky Ýaşlar guramasynyň Balkan welaýat geňeşiniň başlygynyň wezipesini wagtlaýyn ýerine ýetiriji Güýçmyrat Ýagşyýew biziň bilen gürrüňdeş bolanda aýtdy.
