Türkmenistanyň Medeniýet ministrliginiň Şekillendiriş sungatynyň sergi merkezinde Bäşim Nuraly adyndaky çagalar çeperçilik mekdebiniň okuwçylarynyň işleriniň sergisi geçirildi. Çagalar birnäçe ýyldan bäri islendik suratkeş üçin abraýly hasaplanýan bu meýdançada hasabat sergileri bilen çykyş edip gelýärler. Emma bu gezekki sergi hakyky baýramçylyga öwrüldi.
Çeperçilik mekdebiniň okuwçylarynyň surat eserleri bilen diwarlaryň ýokarsyna çenli bezelen sergi merkezi myhmanlary dabaraly garşylady. Zehinli aýdymçy Begenç Moşşyýewiň ýerine ýetirmeginde ýaňlanan italýan wokal nusgawy eserleri bu wakanyň aýratynlygyny has-da güýçlendirdi. Sergä gatnaşýan işleriň awtorlary dostlarynyň, ene-atalarynyň hem-de beýleki döredijilik mekdepleriniň okuwçylarynyň gutlaglaryny kabul etdiler. Žurnalistler bolsa Bäşim Nuraly adyndaky çagalar çeperçilik mekdebiniň mugallymlary bilen söhbetdeş boldular.
– Geçen ýylky hasabat sergimizde 654 iş görkezilipdi, şu ýyl bolsa olaryň sany 800-e ýetdi – diýip, Bäşim Nuraly adyndaky çagalar çeperçilik mekdebiniň direktorynyň okuw-terbiýeçilik işleri boýunça orunbasary Ýazmyrat Pirgulyýew aýtdy. – Biz has-da köp eser getirip bilerdik, ýöne sergi merkezinde ýer ýetmedi. Okuw ýylynyň başynda men çagalara şeýle maslahat berdim: ýürekleriňizi açmakdan gorkmaň, öz bagtyňyzy we deň-duşlaryňyzyň bagtyny paýlaşyň. Şeýle-de ýatda saklaň, üstünlik gazanmak üçin bir göterim zehin we togsan dokuz göterim zähmet gerekdir.
Zehinli oglan-gyzlar halypalaryň maslahatyna höwes bilen eýerdiler. Netijede, sergi merkezinde görkezilen ägirt uly ekspozisiýa «Biziň bagtly çagalygymyz» diýen esasy mowzuga doly laýyk geldi. Akwarel eserlerde çagalaryň oýunlaryndan pursatlar, söýgüli dostlarynyň portretleri, saz toparlarynyň çykyşlary, şäher görnüşleri, umuman, çagalaryň gözi bilen gören we tomaşaçylar bilen paýlaşmak islän ähli zatlary şekillendirilipdir.
Selbi Annamuhammedowanyň «Pökgi kimiňki?» atly suraty aýratyn gyzyklanma döretdi. Oglanlaryň oýnan pökgüsi itiň goraýan ýerine togalanyp gidýär. Çagalar ony almaga synanyşýarlar, ýöne it gazaply hyňranyp, edil: «Berjek däl!» diýýän ýaly. Bu ýagdaýyň soňunyň nähili tamamlanandygy belli däl, emma, surat sergä gelenleriň ünsüni özüne çekdi.
Alisa Belousowanyň we onuň joralarynyň iň halaýan oýny gizlenpeçek. Onuň «…Üç, dört, bäş, men gözlemäge barýaryn» diýen atly eserinde çagalar sanawdan soň tiz-tizden gizlenýärler. Çagalaryň tizligini, ugurtapyjylygyny we zehinini ösdürýän bu meşhur oýun dünýäniň ähli ýurtlarynda oýnalýar. Aýjeren Ataýewa bolsa «Awazada» dynç alýan üç çaganyň şatlygyny tomaşaçylar bilen paýlaşdy. Deňiz kenarynda suratyň tomaşaçylaryna tarap bagtly çagalar ylgap barýar.
Mähri Pattaýewa meşhur «Küştdepdi» tansynyň ýerine ýetirilişini şekillendirdi. Stefaniýa Barnaşewa ekspressionizm usulynda şäher görnüşini görkezdi. Arslan Parçamow köne Aşgabady ýagyşly howada romantiki görnüşde janlandyrdy, Merhem Saparaliýewanyň suraty bolsa tomaşaçylara paýtagtymyzda gar ýagýan günleriniň hem bolýandygyny ýatlatdy.
Sergi boýunça gürrüňi dowam etdirip bolar, sebäbi ähli 800 eser ýurdumyzyň ýaş raýatlarynyň ýaşaýan bagtly durmuşyny beýan edýär. Sergide surat eserleri bilen bir hatarda Bäşim Nuraly adyndaky çagalar çeperçilik mekdebiniň okuwçylary tarapyndan taýýarlanan heýkeller, gobelenler we şaý-sepler hem görkezildi.
