Her ýyl 3-nji iýunda Türkmenistanda we daşary ýurtlarda Bütindünýä welosiped güni giňden bellenilýär. Bu baýramçylyk mynasybetli Türkmenistanyň daşary ýurtlardaky diplomatik we konsullyk wekilhanalary köpçülikleýin welosiped çärelerini gurnadylar. Bu barada Türkmenistanyň DIM-niň web-saýtynda habar berilýär. 

Şunuň bilen baglylykda, Bütindünýä welosiped güni mynasybetli Türkmenistanyň Azerbaýjan Respublikasyndaky Ilçihanasy Baku şäherindäki «Primorskiý bulwar» seýilgähinde welosiped ýörişini geçirdi. Bu çäre Bütindünýä welosiped güni mynasybetli gurnaldy. Welosiped ýörişine Ilçihananyň wekilleri, Azerbaýjandaky türkmen diasporasynyň agzalary, şeýle hem ýokary okuw jaýlarynda okaýan türkmen talyplary we ýaşlar gatnaşdylar.

Şeýle hem Türkmenistanyň Özbegistan Respublikasyndaky Ilçihanasy Bütindünýä welosiped güni mynasybetli welosiped ýörişini gurnady. Sport çäresi Daşkent şäherinde geçirildi. Welosiped ýörişine Ilçihananyň işgärleri we Özbegistanda okaýan türkmen talyplary gatnaşdy.

Weloýöriş ýokary guramaçylyk derejesinde, dostluk we agzybirlik ruhunda geçirildi. Oňa gatnaşyjylar sagdyn durmuş ýörelgelerini berkitmäge, ýaşlaryň beden we ruhy taýdan sazlaşykly ösmegine, şeýle hem ekologiýa jogapkärçiligini ýokarlandyrmaga gönükdirilen çäreleriň ähmiýetini aýratyn bellediler.

3-nji iýunda Türkmenistanyň Täjigistan Respublikasyndaky Ilçihanasynyň guramagynda Duşanbe şäherinde hem Bütindünýä welosiped güni mynasybetli welosiped ýörişi geçirildi. Welosiped ýörişine Ilçihananyň işgärleri, Täjigistanda okaýan türkmen talyplary we Duşenbe şäheriniň welosiped jemgyýetiniň wekilleri gatnaşdy.

Çäräniň geçirilmeginiň maksady welosiped hereketini giňden wagyz etmek, ekologiýa taýdan arassa ulag görnüşlerini öňe sürmek, durnukly ösüş we sagdyn durmuş ýörelgelerini goldamakdan ybaratdyr.

Mundan başga-da, Wena şäherinde ekologiýa taýdan arassa ulag, sagdyn durmuş we durnukly ösüşi wagyz etmek maksady bilen welosiped ýörişi geçirildi. Bu çäre Türkmenistanyň Awstriýa Respublikasyndaky Ilçihanasy tarapyndan Niderlandlar Patyşalygynyň, Bolgariýa Respublikasynyň we Kolumbiýa Respublikasynyň Ilçihanalary bilen bilelikde hem-de Radlobby welosiped assosiasiýasy we Wien Mobilität guramasynyň goldaw bermeginde gurnaldy.

Çärä 100-den gowrak adam, şo sanda diplomatik korpusynyň ýolbaşçylary hem-de wekilleri, Wenada işleýän halkara guramalaryň wekilleri, türkmen raýatlary, şäher ýaşaýjylary we beýleki myhmanlar gatnaşdy.