Paýtagtymyzyň Magtymguly adyndaky milli sazly drama teatrynda Türkmenistanyň Medeniýet ministrliginiň gatnaşmagynda Italiýanyň Aşgabatdaky ilçihanasy tarapyndan guralan italiýaly soprano Zoe Papasyň konserti boldy. Konsertiň başynda Italiýanyň Türkmenistandaky Adatdan daşary we Doly ygtyýarly ilçisi italýan operasyna gyzyklanma bildirýän diňleýjilere hoşallygyny bildirdi we konsertiň gyzykly geçmegini arzuw etdi.

Italýan opera wokalisti Zoe Papas gelip çykyşy boýunça Gresiýaly. Ol dört ýaşyndan bäri saz çalmak we aýdym aýtmak bilen meşgullanýar. Esasan hem milli grek aýdymlaryny aýdýardy. Wokal maglumatlarynyň kömegi bilen ony Afinyda liriki hora kabul etdiler. Ol ilkinji gezek opera diňlände onda gyzyklanma döredi. Ol ariýa aýtmagy öwrenmek üçin Italiýa göçdi.

Konserti Türkmenistanyň at gazanan artisti Resul Gylyjowyň ýolbaşçylygyndaky Türkmenistanyň Döwlet simfoniki orkestriniň sazandalary açdy. Olar Juzeppe Werdiniň «Ouvertura da La forza del destino» eserini ýerine ýetirdiler.

Sahnada Zoe Papas. Ýene-de Werdiniň eseri «La Vergine degli Andeli» sahnada. Onuň ýumşak sesi diňleýjileriň joşgunly el çarpyşmalaryna mynasyp boldy. Şol gün agşam teatrda Pýetro Maskanýi, Jakomo Puççini, Gaetano Donisetti, Luiji Arditi we beýleki kompozitorlaryň eserleri ýaňlandy. Zoe Papas ariýalary ýerine ýetirende dürli duýgulary başdan geçirýärdi, bu bolsa onuň sesine aýratyn öwüşgin berýärdi.

Konsertiň soňunda Zoe grek dilinde "Sirtaki" aýdymyny aýtdy. Döwlet orkestri bu tansyň kompozitor Mikis Teodorakisiniň ýerine ýetiren "Grek Zorba" kinofilmindäki sazyny çaldylar. Konsertiň soňunda Zoe Papas žurnalistler bilen gepleşik geçirdi. Şonda ol gowy görýän kompozitorynyň Gaetano Donisettidigini, hem-de Resul Gylyjowyň simfoniki orkestrinde zähmet çekýän sazandalar ýaly öz hünärine ökde sazandalary heniz görmändigini aýtdy.