Filippinleriň paýtagty Manilada geçirilen halkara «Karate-1» ýaşlar ligasynyň dünýä tapgyry ýaryşynda türkmenistanly türgenler altyn we bürünç medal gazandylar.
Bütindünýä karate federasiýasynyň (BKF) howandarlygynda geçirilen ýaryşa 58 ýurtdan 790 türgen gatnaşdy, olar 12 ýaşdan 20 ýaşa çenli ýaş toparlarynda medallar ugrunda bäsleşdiler.
Türkmenistanyň Karatedo federasiýasynyň maglumatyna görä, ýaryşa gatnaşan toparymyzda dört türgen, bir tälimçi we üç sany halkara emin bardy.
Kumite boýunça ýetginjekleriň (16 – 17 ýaş) arasynda 55 kilogram agram derejesinde Aşgabat şäherindäki ýöriteleşdirilen 52-nji orta mekdebiň 12-nji synp okuwçysy Raýan Gurbanmyradow altyn medal gazandy. Şu ugurda bürünç medala bolsa ýetginjekleriň arasynda (14 – 15 ýaş) 57 kilogram agram toparynda Aşgabat şäherindäki ýöriteleşdirilen 61-nji orta mekdebiň 10-njy synp okuwçysy Alymuhammet Kakalyýew mynasyp boldy. Bu türgenleriň ikisi-de 5-nji dan gara guşak eýesi Aýdyň Çaryýewiň ýolbaşçylygynda Türkmenistanyň milli ýygyndy toparynda türgenleşýärler.
Özi-de, A. Kakalyýewiň bu abraýly ýaryşlarda üstünlik gazanmagy ilkinji gezek däl. Ol 2024-nji ýylda Fujeýrede (Birleşen Arap Emirlikleri) we La Korunýede (Ispaniýa) geçirilen «Ýaşlar Karate Ligasy 1» ýaryşlarynda 14 ýaşa çenli türgenleriň arasynda 55 kilogram agram toparynda iki gezek üçünji orny eýeledi.
Öňräk, ýagny şu ýylyň fewral aýynda Aýdyň Çaryýewiň başga bir şägirdi, Ahal welaýatynyň Ak Bugdaý etrabyndaky ýöriteleşdirilen 16-njy orta mekdebiň 11-nji synp okuwçysy Gurbannazar Amandurdyýew BAE-niň Fujeýre şäherinde geçirilen «Ýaşlar Karate Ligasy 1» ýaryşynda kumite boýunça bürünç medala mynasyp boldy. Ol bu üstünligi ýetginjekleriň (16 – 17 ýaş) arasynda 55 kilogram agram derejesinde gazandy.
