Türkmenistanyň Döwlet şekillendiriş sungaty muzeýinde «Türkmen topragyna syýahat» atly üýtgeşik fotosergi açyldy. Sergi Türkmenistanyň Medeniýet ministrliginiň goldawynda Türkmenistandaky Fransuz instituty we Fransiýa Respublikasynyň Türkmenistandaky ilçihanasy tarapyndan guraldy. Fotoserginiň açylyş dabarasyna Fransiýa Respublikasynyň Türkmenistandaky Adatdan daşary we Doly ygtyýarly ilçisi, Türkmenistanda akkreditirlenen diplomatik wekilhanalaryň wekilleri, gazet-žurnallaryň žurnalistleridir fotohabarçylary, muzeý işgärleri, taryhçylar we etnograflar gatnaşdylar.
Sergä gelen myhmanlara fransuz suratçy Pol Nadar tarapyndan 1890-njy ýylda düşürilen üýtgeşik fotosuratlar görkezildi. Taryhy kadrlar Merkezi Aziýanyň ýerli halkynyň döwürleriň çatrygyndaky durmuşynyň täsirli suratyny geljegiň nesillerine ýetirýär. Merkezi Aziýanyň taryhy boýunça hünärmen hanym Swetlana Gorşenina sergä gelenler bilen Pol Nadaryň şahsyýeti barada gyzykly gürrüňdeşlik geçirdi. Meşhur fransuz suratçynyň ogly Pol Nadar (1856 – 1939) tehniki täzelikler we syýahatlar bilen gyzyklanyp, maşgala kärini dowam etdirdi we öz döwrüniň iň görnükli fransuz suratçylarynyň birine öwrüldi. Onuň amala aşyran ekspedisiýalary ýewropalylara düýbünden mälim bolmadyk ýerleri surata düşürmäge mümkinçilik berdi.
1890-njy ýylda Pol Nadar Merkezi Aziýanyň ýüregine üýtgeşik syýahat etdi. Ol Daşkentde açylmaly bolan, Hazarýaka demir ýolunyň ösüşine bagyşlanan I halkara sergi üçin maglumatlary ýygnaýardy. Ol döwürde Hazarýaka demir ýoly döwrebaplaşmagyň we Merkezi Aziýanyň ýewropalylar üçin açylmagynyň nyşanydy.
S.Gorşenina ilki bilen sergä gelenleri Pol Nadaryň ýolbaşçylygyndaky pikirdeşler toparynyň iş ulgamyny görkezýän suratynyň ýerleşdirilen serginiň merkezi bölümine çagyrdy. Pol Nadaryň fotosuratlary özüniň resmi taýdan gymmaty bilen üýtgeşik bolmagyndan başga-da, olarda XIX asyryň aýagyndaky Merkezi Aziýanyň janly keşbini häsiýetlendirýän gündelik durmuşyň iň nepis pursatlary uly duýgurlyk bilen şekillendirilýär. Ýerli ýaşaýjylaryň portretleri, türkmen topragynyň tebigy gözellikleri, gündelik durmuş pursatlary we gadymy medeni binalar arkaly fotosergi myhmanlara umumy medeni mirasy täzeden açmaga we taryhy wakalara täzeden garamaga kömek edýär.
Bu gün bu fotogymmatlyklar şol döwrüň jemgyýetine, medeniýetine we durmuş ýörelgesine has gowy düşünmäge mümkinçilik berýän bahasyna ýetip bolmajak mirasdyr. Mundan başga-da, fotosergi suratyň XIX asyryň aýagyndan XXI asyryň başyna çenli bolan taryhy wakalary janly ýetirmäge ukyply ornuny aýratyn görkezýär. Şonuň bilen birlikde, has ähmiýetli zady bu suratlar Pol Nadaryň ýokary çeperçilik başarnygyna we suratkeşlik ukybyna aýdyň şaýatlyk edýär.
