Ýurdumyzda her ýylyň 27-nji iýunynda ýokary ruhubelentlige beslenip geçirilýän Medeniýet we sungat işgärleriniň hem-de Magtymguly Pyragynyň şygryýet güni, şeýle hem iýun aýynyň üçünji ongünlüginde geçirilýän Medeniýet günleri mynasybetli dürli çärelere giň gerim berilýär.
Bu tutumly çäreler bolsa halkymyzyň ruhy dünýäsiniň özenini kesgitleýän medeniýet, sungat we döredijilik işgärleriniň özboluşly hasabatyna öwrülýär. Şu ýörelge esasynda Lebap welaýatynyň Taryhy we ülkäni öwreniş muzeýinde welaýat ýörite sungat mekdebiniň nakgaşlyk bölüminiň mugallymy Alymjan Işankulyýewiň hem-de Türkmenabat şäheriniň çagalar çeperçilik mekdebiniň mugallymy Ýelena Işankulyýewanyň we olaryň tälim berýän şägirtleriniň – şu ýyl welaýat ýörite sungat we Türkmenabadyň çagalar çeperçilik mekdeplerini tamamlaýan talyplaryň we okuwçylaryň çeken suratlarynyň «Bedew bady bilen halypadan şägirde uzaýan ylham» atly nakgaş-grafika eserleriniň sergisi guraldy.
Serginiň açylyş dabarasyna ýurdumyzyň belli suratkeşleriniň, medeniýet we sungat işgärleriniň, şeýle hem talyp ýaşlaryň gatnaşmaklary onuň täsirliligini has-da artdyrdy. Serginiň açylyşyndan soňra, oňa gatnaşyjylar A.Işankulyýewiň hem-de Ý.Işankulyýewanyň, şeýle-de olardan tälim alýan ýaş suratçylaryň döreden eserleri bilen tanyşdylar. Bu eserlerde ajaýyp türkmen tebigatynyň, milli gymmatlyklarymyzyň, şol sanda türkmen bedewleriniň nurana keşpleri öz beýanyny tapypdyr.
Ýaş, zehinli awtorlaryň öz döredijiligi bilen döwlet we halkara derejesinde onlaýn arkaly dürli bäsleşiklere gatnaşyp, olarda ýeňiji bolandyklaryny sergide ýerleşdirilen kuboklar, Hormat hatlary, ýörite diplomlar subut edýär. Talyp we okuwçy ýaşlaryň sungat äleminde ýeten derejeleri ussat halypalar A.Işankulyýewiň we Ý.Işankulyýewanyň çeken yhlasly zähmetiniň netijeleridir. Welaýat Taryhy we ülkäni öwreniş muzeýinde guralan sergi talyp we okuwçy ýaşlaryň, olaryň ussat halypalarynyň hünär baýramçylygyna taýýarlan mynasyp sowgatlarydyr.
Welaýat Medeniýet müdirliginiň hem-de welaýat kitaphanasynyň bilelikde guramaklarynda Medeniýet we sungat işgärleriniň hem-de Magtymguly Pyragynyň şygryýet güni, şeýle hem ýurdumyzda däp bolup galan Medeniýet hepdeligi mynasybetli «Medeniýet halkyň kalbydyr» atly döredijilik maslahaty geçirildi. Maslahata baýry medeniýet, sungat we döredijilik işgärleri bilen birlikde öz ykbalyny medeniýet we sungat bilen baglan ýaş hünärmenler hem gatnaşdylar. «Halypa-şägirtlik» ýolunyň barha dabaralanýandygynyň subutnamasyna öwrülen bu maslahatda halypa medeniýet işgärleri çykyş edip, Gahryman Arkadagly, Arkadagly Gahryman Serdarly ýurdumyzda sungat işgärleriniň öňünde durýan wajyp wezipeler, onuň ösmekligi üçin döredilýän şertler, milli mirasymyzy öwrenmek, nesillere geçirmek we dünýä ýaýmak boýunça alnyp barylýan işler barada giňişleýin gürrüň berdiler.
Dabaraly maslahatdan soňra, oňa gatnaşyjylar welaýat kitaphanasynyň işgärleri tarapyndan guralan kitap sergisi bilen tanyşdylar. Sergide ýerleşdirilen türkmen halkynyň Milli Lideriniň we hormatly Prezidentimiziň türkmen halkynyň taryhy, baý milli mirasy, dünýäniň medeni mirasyna önjeýli goşant goşan türkmen halkynyň özboluşly milli medeniýeti baradaky çuňňur mazmunly eserleri maslahata gatnaşyjylarda ýatdan çykmajak täsirler galdyrdy.
