Ýakynda Türkmenistanyň Suratkeşler birleşiginiň Sungat galereýasynda täze sergi açyldy. Onda 50-ä golaý türkmen suratkeşleri tarapyndan döredilen 140-dan gowrak sungat eserleri tomaşaçylara hödürlenýär. Sergi heýkeltaraş Maksatmyrat Hojaýynowyň kiçi göwrümli heýkellerinden düzülen ekspozisiýa bilen açyldy.
Heýkelleriň arasynda «Ýewropanyň alnyp gaçylyşy» atly eser myhmanlarda aýratyn gyzyklanma döretdi. Bu eser gadymy rowaýata esaslanýar. Rowaýata görä, Zews owadan ak öküziň keşbine girip, şa gyzy Ýewropany alyp gaçýar. Bu waka dünýä şekillendiriş sungatynda giňden beýan edilen temalaryň biridir. Şol temada döredilen iň meşhur eserleriň biri rus suratkeşi Walentin Serowyň döreden suratydyr.
Maksatmyrat Hojaýynow hem bu täsirli rowaýaty öz döredijiliginde beýan edip, «Ýewropanyň alnyp gaçylyşy» atly kiçi göwrümli heýkeli döredipdir. Ol öküziň keşbini güýç-kuwwatly, belent ruhly görnüşde şekillendirip, onuň tebigy kuwwatyny ussatlyk bilen açyp görkezmegi başarypdyr. Şa gyzy Ýewropanyň keşbi bolsa başgaça çemeleşme bilen berilýär.
Suratkeş Baýdurdy Berdiýewiň «Horaz urşy» atly eseri hem sergä gelýänleriň ünsüni özüne çekýär. Eserde üç sany sylagly ýaşuly emin hökmünde iki horazyň çekeleşikli söweşine syn edýärler. Bäsdeş horazlaryň gazaply göreşi we ýaşulularyň asudalygy biri-birine güýçli garşylyk döredýär. Awtor suraty gök, çal we gyzyl reňkleriň sazlaşygynda ýerine ýetirip, eseriň täsirini has-da güýçlendiripdir.
Iki suratkeşiň eserlerinden emele gelen özboluşly triptih hem tomaşaçylarda uly gyzyklanma döredýär. Kamil Weliahmedow «Jemal daýza» atly suratynda ýaşynyň birçene barandygyna garamazdan, zähmetsöýer zenany şekillendirýär. Polat Garryýew bolsa «Ene» atly eserinde ellerini dyzynyň üstünde goýup oturan, öz zähmet borjuny ýerine ýetiren ýaly täsir galdyrýan garry enäniň keşbini döredýär. Onuň «Keýjan ene» atly eserinde bolsa ýaşuly zenan düýe sürüsine umytly nazar bilen seredýär. Bu sungat eserlerini synlanyňda bolsa, bir ýaşdaky üç zenan – üç ykbal we ýaşaýşa üç dürli garaýyş göz öňüňe gelýär.
Azat Myradow «Aşgabadyň panoramasy» atly triptihinde paýtagtymyzy günüň dürli wagtlarynda şekillendirip, onuň gözelligini we döwrebap keşbini ussatlyk bilen açyp görkezýär.
Sergide mundan başga-da Baýdurdy Berdiýewiň «Bazarda», Möjek Çaryýewiň «Kerwen», Guwanç Hojanyýazowyň «Kädiler», Şöhrat Berdiýewiň «Oba säheri» ýaly köp sanly täsirli eserleri görkezilýär.
Sungat galereýasyna baryp görmek boş wagtyňy manyly geçirmegiň hem-de häzirki zaman şekillendiriş sungatynyň ajaýyp nusgalary bilen tanyşmagyň iň gowy usullarynyň biri bolup durýar. Bu ýerde diňe bir ussat suratkeşleriň döredijiligi bilen tanyşmak däl, eýsem, göwne ýaran eserleri satyn almak mümkinçiligi hem bar.
Sungat galereýasy Aşgabat şäheriniň A.Berdiýew köçesiniň 135/1 salgysynda ýerleşýär. Goşmaça maglumatlary +993 62 98-08-07 belgili telefon arkaly alyp bilersiňiz.
