2026-njy ýylyň 30-njy iýulynda, Pekin şäherinde Türkmenistanyň Halk Maslahatynyň nobatdaky mejlisine bagyşlanan Türkmen-Hytaý dialogy geçirildi. Çäre türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Gurbanguly Berdimuhamedowyň alyp barmagynda şu ýylyň 15-nji iýulynda geçirilen Türkmenistanyň Halk Maslahatynyň Prezidiumynyň mejlisine we onuň dowamynda kabul edilen wajyp çözgütlere bagyşlandy. Bu barada Türkmenistanyň DIM-niň web-saýtynda habar berilýär.
Dialog Türkmenistanyň HHR-daky Ilçihanasy we “China-Turkmenistan Business Council Ltd.” guramasy tarapyndan bilelikde, türkmen diplomatlarynyň, talyp ýaşlaryň, görnükli hytaý syýasatşynaslarynyň, professorlarynyň, Hytaý Halkara parahatçylyk gaznasy ýaly abraýly jemgyýetçilik guramalaryň ýolbaşçylarynyň we wekilleriniň, şonuň ýaly-da Çiňhaý we Gansu welaýat ylym-bilim edaralarynyň ýolbaşçylarynyň wekilleriniň gatnaşmagynda geçirildi.
Dabaraly çäräni Türkmenistanyň Hytaý Halk Respublikasyndaky Ilçisi açyp, ýygnananlary Türkmenistanyň Halk Maslahatynyň nobatdaky mejlisini ýokary guramaçylyk derejesinde geçirmek bilen bagly Türkmenistanyň Prezidenti Serdar Berdimuhamedowyň beren tabşyryklary hem-de Gahryman Arkadagymyzyň kesgitläp beren wezipeleri esasynda ýurdumyzda ulgamlaýyn alnyp barylýan işler bilen tanyşdyrdy.
Şeýle-de, Ilçi Türkmen-Hytaý dialogyna gatnaşyjylary Türkmenistanyň sosial abadançylygy we ykdysady ösüşi, türkmen-hytaý strategiki hyzmatdaşlygynyň anyk ugurlary we öňden goýlan maksatlar bilen tanyşdyrdy.
Golaýda BMG-niň Baş Assambleýasy tarapyndan Türkmenistanyň başlangyjy esasynda «2028-nji ýyl Halkara hukugynyň ýyly» atly Kararnamanyň biragyzdan kabul edilendigi, resminamanyň awtordaşy hökmünde 78 döwletiň, şol sanda Hytaýyň hem çykyş edendigi aýratyn bellenildi.
Soňra Lançžou uniwersitetiniň Türkmenistany öwreniş merkeziniň direktory Professor Wan Syhaýyň, Çinghaý Milletler Uniwersitetiniň Merkezi Aziýa we Türkmenistan barlaglar merkeziniň direktorynyň orunbasary hanym Ma Sýaoaýyň, Gansu welaýatynyň Jemgyýetçilik ylymlary akademiýasynyň wise-prezidenti, uly ylmy işgäri jenap Çen Ýonşeňiň, Türkmenistanyň at gazanan atşynasy, jenap Ýue Gaofeňiň, Dubaň Ätiýaçlandyryş Kompaniýasynyň wise-prezidenti jenap Ýu Huýiniň, Çinghaý Milletler Uniwersitetiniň Merkezi Aziýa we Türkmenistan barlaglar merkeziniň kömekçi ylmy işgäri hanym Ma Tinnanyň, “China-Turkmenistan Business Council Ltd.” guramasynyň baş sekretarynyň we beýlekileriň çykyşlary diňlenildi.
Çykyş edenler Mukaddes Garaşsyzlygymyzyň şanly 35-ýyllygynyň baýram edilýän «Garaşsyz, baky Bitarap Türkmenistan – bedew batly at-myradyň mekany» ýylynda türkmen-hytaý gatnaşyklarynda ýetilen sepgitler, öňden goýlan maksatlar dogrusynda beýan etdiler.
