Gyrgyz Respublikasynyň Çolpon-Ata şäherinde geçirilen Merkezi Aziýa ýurtlarynyň we Azerbaýjan Respublikasynyň döwlet Baştutanlarynyň resmi däl konsultatiw duşuşygynda Türkmenistanyň Prezidenti Serdar Berdimuhamedow 2026-njy ýylyň 8-nji oktýabrynda «Awaza» milli syýahatçylyk zolagynda geçiriljek Merkezi Aziýa ýurtlarynyň we Azerbaýjan Respublikasynyň döwlet Baştutanlarynyň konsultatiw duşuşygynyň esasy ugurlaryny beýan etdi.

Döwlet Baştutanymyzyň bellemegine görä, Aşgabat eýýäm hyzmatdaş ýurtlara bäş ileri tutulýan ugry öz içine alýan gün tertibiniň taslamasyny iberdi:

Howpsuzlyk we durnuklylyk – möhüm sebit we halkara parahatçylyk, durnuklylyk, howpsuzlyk meseleleri boýunça pikir alyşmalar;

Diplomatiýa – Merkezi Aziýa ýurtlarynyň we Azerbaýjan Respublikasynyň syýasy-diplomatik hyzmatdaşlygyny mundan beýläk-de pugtalandyrmak;

Ykdysadyýet we logistika – söwda-ykdysady gatnaşyklary çuňlaşdyrmak, energetika ulgamynda hyzmatdaşlygy giňeltmek, durnukly ulag-logistika geçelgelerini ösdürmek;

Ekologiýa we howanyň üýtgemegi – daşky gurşawy goramak hem-de howanyň üýtgemegine uýgunlaşmak, Amyderýanyň we Syrderýanyň suw serişdelerini rejeli peýdalanmak, Aral deňzini gaýtadan dikeltmek ulgamynda tagallalary utgaşdyrmakda bilelikdäki çäreler;

Ynsanperwer ugry – medeni, ylym-bilim gatnaşyklaryny ösdürmek, talyp we ýaşlar alyşmalaryny giňeltmek.

Hormatly Prezidentimiz Türkmenistanyň bu teklip edilýän meseleleriň Merkezi Aziýa ýurtlary we Azerbaýjan üçin möhüm ähmiýete eýediginden ugur alýandygyny aýtdy hem-de Awazada sammite taýýarlyk görülýän hem-de onuň geçiriljek günlerinde birnäçe halkara forumlaryň we medeni çäreleriň guraljakdygyny nygtady.