12-nji awgustda Arkadag şäheriniň stadionynda AFK-nyň Çempionlar ligasy-2 ýaryşynyň saýlama tapgyrynyň çäklerinde Türkmenistanyň «Arkadag» futbol topary bilen Hindistanyň «Goa» toparynyň arasynda duşuşyk geçiriler. Sagat 20:00-da başlanjak oýnuň öňüsyrasynda geçirilen metbugat maslahatynda toparlaryň baş tälimçileri garaşýan netijeleri barada gürrüň berdiler. Tälimçiler öz toparlarynyň diňe ýeňiş gazanmak üçin meýdança çykjakdyklaryny nygtadylar.
«Goa» toparynyň baş tälimçisi Gouramangi Singh garşydaşyň oýnunda ýokary depginiň we topa eýe bolmagyň esasy aýratynlyklaryny belledi. Ol öz toparynyň muňa çalt we dikleýin hüjümler bilen garşy durmagy maksat edinýändigini aýtdy. Hindistanly tälimçi howa şertleriniň nähili boljakdygyna garamazdan, futbolçylarynyň oňyn netije gazanmak üçin ähli güýjüni sarp etmäge taýýardygyny nygtady.
Öz gezeginde «Arkadag» toparynyň tälimçisi Mergen Orazow möwsümiň öňüsyrasyndaky taýýarlygyň ýokary derejede geçirilendigini we futbolçylaryň häzirki wagtda gowy ýagdaýdadygyny aýtdy. Toparyň AFK-nyň Çagyryş ligasynda gazanan öňki üstünligini ýatladan Mergen Orazow «Arkadag» toparynyň maksadynyň AFK-nyň Çempionlar ligasy-2 ýaryşynyň toparçalaýyn tapgyryna çykmakdygyny belledi. Ol türkmen toparynyň duşuşygyň ilkinji pursatlaryndan başlap, soňky minutlaryna çenli ýeňiş ugrunda göreşjekdigini nygtady.
