«Iş nokady» işewürlik merkezinde Türkmenistanyň döredijilik ykdysadyýetiniň ösüşine, onuň mümkinçiliklerine we geljegine bagyşlanan duşuşyk geçirildi. Çärä döwlet edaralarynyň, döredijilik işewürligiň kärhanalarynyň, jemgyýetçilik birleşikleriniň wekilleri, şeýle hem ýerli we halkara hünärmenler gatnaşdy.
Myhmanlara gutlag sözi bilen Beýik Britaniýanyň Türkmenistandaky ilçihanasynyň wekili hanym Kler Ollbless ýüzlendi. Ol soňky birnäçe ýylyň içinde diplomatik wekilhananyň ýurdumyzyň ýokary döredijilik, innowasion we telekeçilik mümkinçiliklerine köp gezek göz ýetirmäge mümkinçilik alandygyny nygtady.
– Biz ýurduň döredijilik ykdysadyýetini ösdürmäge ýardam bermek üçin britaniýaly tejribämizi we hünär bilimimizi paýlaşmaga çalyşdyk. Türkmenistan baý medeni mirasa, özboluşly däp-dessurlara, zehinli ussatlara we barha artýan täzeçillikler bileleşigine eýedir. Bu zatlaryň hemmesi hem milli, hem halkara derejede ýokary ykrar edilmäge we öňe sürmäge mynasyp bolan gymmatly baýlyklardyr – diýip, hanym Ollbless belledi.
Ýurdumyzda döredijilik ykdysadyýetini öňe sürmegiň möhüm tapgyry Türkmenistanyň Hökümetiniň goldamagynda BMGÖM, Beýik Britaniýanyň ilçihanasy, Türkmenistanyň Maliýe we ykdysadyýet ministrligi hem-de ÝUNESKO-nyň işleri barada Milli topary bilen hyzmatdaşlykda 2025-nji ýylyň ýazynda Aşgabatda geçirilen «Türkmenistanyň döredijilik we innowasiýa ykdysadyýeti» atly birinji halkara forumy boldy. Mundan başga-da, ýurdumyzyň döredijilik hünärmenleriniň wekiliýeti Daşkentde geçirilen «Creative Central Asia 2026» atly sebit forumyna gatnaşdy.
Ýakyn wagtda Türkmenistanyň Ykdysatçylar birleşmesiniň ýanynda Döredijilik we innowasiýa ykdysadyýeti ösdürmek boýunça täze bölüm açyldy. Onuň wezipesi milli ykdysadyýeti döwrebaplaşdyrmaga we diwersifikasiýalaşdyrmaga ýardam bermekden ybaratdyr.
Bölümiň we ol bilen bilelikde işlän hünärmenler toparynyň ilkinji ädimleri pudagyň ýagdaýyny öwrenmek hem-de ýurdumyzyň döredijilik we innowasiýa senagatlarynyň kartasyny düzmek boýunça taslamany işläp taýýarlamak boldy. Alnan netijeler, häzirlikçe, deslapky häsiýete eýe bolsa-da, halkara hünärmen Dana Şaýahmetiň belleýşi ýaly, görlen tagallalar eýýäm bu pudagy ösdürmäge bolan badalga beriji güýje şaýatlyk edýär.
Duşuşygyň ahyrynda gatnaşyjylar pudagy bahalandyrylyşa we işewürligi bazarda netijeli işlemäge taýýarlamagyň amaly meselelerini ara alyp maslahatlaşdylar. Hünärmenler IT-pudagynda we döredijilik startaplarynda özlerini görkezýän türkmen ýaşlarynyň ýokary mümkinçiliklerini we işjeňligini öňe sürdüler.
Şu günki günden başlap Türkmenistanyň Ykdysatçylar birleşmesine ýüzlenip ýa-da açyk networking sessiýalarynda sowalnamany dolduryp, bileleşige goşulyp we Döredijilik we innowasiýa ykdysadyýeti ösdürmek boýunça bölümiň agzasy bolup bilersiňiz. Bölümiň işi döredijilik senagaty we dizaýn, maglumat tehnologiýalary we media, senetçilik, moda we art-pudagy, şeýle hem innowasion telekeçilik ýaly ugurlary öz içine alýar.
