Mukaddes Garaşsyzlygymyzyň şanly 35 ýyllygy mynasybetli ýurdumyzyň edebiýat, medeniýet we sungat işgärleriniň, höwesjeň aýdymçy ýaşlaryň arasynda Türkmenistanyň Prezidentiniň yglan eden «Türkmeniň Altyn asyry» atly bäsleşiginiň çäklerinde geçirilýän «Ýaňlan Diýarym! – 2026» telebäsleşiginiň Mary welaýat tapgyry ýokary ruhubelentlige beslendi.
Berkarar döwletiň täze eýýamynyň Galkynyşy döwründe bedew bady bilen öňe barýan ýurdumyzda milli medeniýetimizi, aýdym-saz sungatymyzy ösdürmekde uly işler geçirilýär. Zehinli ýaş höwesjeň aýdymçylary ýüze çykarmak maksady bilen ýurdumyzda her ýylda geçirilýän «Ýaňlan Diýarym!» telebäsleşigi möhüm orny eýeleýär. Halkymyzyň müň öwüşginli aýdym-saz sungatyny giňden beýan etmekde, höwesjeň estrada aýdymçylaryň hünär ussatlyklaryny ýüze çykarmakda bu bäsleşigiň Mary welaýat tapgyry «Türkmeniň Ak öýi» binasynyň öňündäki toý meýdançasynda geçirildi. «Türkmeniň Ak öýi» binasynyň daş-töweregi toý ruhuna beslendi. Bu sungat bäsleşigine deslapky etrap-şäher tapgyrlarynda üstün çykan aýdymçy ýaşlaryň 10-sy gatnaşdy.
Ajaýyp toý lybasyna beslenen «Türkmeniň Ak öýi» binasynyň öňündäki meýdançada aýdym-saz sungatynyň muşdaklary, medeniýet-sungat işgärleri, welaýat merkeziniň ýaşaýjylary we myhmanlary ýygnandylar. Olar ýaş ýerine ýetirijileriň çykyşlaryny şowhun bilen garşyladylar. Bezemen toý sahnasynda bagtyýarlyk mukamlary alyslara ýaň saldy.
Göwünleri joşduran aýdym-sazlarda bagtyýarlyk döwrümiz, hormatly Prezidentimiziň alyp barýan döwletli tutumlary, Garaşsyzlygymyzyň şanly 35 ýyllygy, ýurdumyzyň parahatlygy giňden wasp edildi. Ýaş aýdymçylar döwrebap we halk aýdymlary aýtmakda özara bäsleşdiler.
Bu zehin bäsleşiginde sahnada özüni alyp barşy, ýerine ýetirijilik ussatlyklary, aýdymyň sözlerini dogry aýdyşy, milli egin-eşigi boýunça has tapawutlanan ýaş aýdymçylaryň ikisi – Mary şäheriniň «Margiana» medeniýet öýüniň höwesjeň aýdymçysy Uzukjemal Pälwanowa hem-de Marynyň Beýik Saparmyrat Türkmenbaşy adyndaky Ruhyýet köşgüniň höwesjeň aýdymçysy Mähri Akmyradowa öňe saýlandy. Emin agzalarynyň ýokary bahasyna mynasyp bolan aýdymçy ýaşlar «Ýaňlan Diýarym!» telebäsleşiginiň döwlet tapgyryna gatnaşmaga hukuk gazandylar. Ýeňijilere we oňa gatnaşyjylara dabaraly ýagdaýda ter gül desseleri hem-de gymmat bahaly ýadygärlik sowgatlary gowşuryldy.
