Hytaýyň Harbin şäherinde Aziýanyň Olimpiýa Geňeşi bilen Halkara konkide typmak birleşigi (ISU) tarapyndan bilelikde guralan şort-trek boýunça Aziýanyň ýaşlar türgenleşik ýygnanyşygy geçirildi. Okuw-türgenleşik ýygnanyşygy Aziýanyň dürli ýurtlaryndan ýaş türgenleri we tälimçileri bir ýere jemledi.

Türgenleşiklere Türkmenistanyň şort-trek boýunça ýygyndy toparynyň baş tälimçisi Aýhanum Gulamalyýewanyň ýolbaşçylygynda çykyş edýän türkmenistanly ýaş türgenler – Daňatar Muhamow we Merýem Hudaýgulyýewa gatnaşdylar.

Türkmen türgenleri ISU-nyň hünärmenleriniň ýolbaşçylygynda tehniki ussatlygy ýokarlandyrmaga we geljekki halkara ýaryşlaryna taýýarlyga gönükdirilen güýçli türgenleşikleri geçdiler. Ussatlyk sapaklaryny we türgenleşikleri halkara derejesindäki ýaryşlaryň meşhur türgenleri, çempionlary we baýrak eýeleri geçirdiler.

19 – 27-nji iýul aralygynda geçirilen okuw-türgenleşik ýygnanyşygy Aziýada gyşky sport görnüşlerini ösdürmek we ýaş türgenleri goldamak maksatnamasynyň çäklerinde guraldy. Taslamanyň esasy maksady geljegi uly türgenleri iri halkara ýaryşlaryna, şol sanda 2027-nji ýyldaky «Aziýanyň çagalary» oýunlaryna we 2029-njy ýylda Almaty şäherinde geçiriljek gyşky Aziýa oýunlaryna taýýarlamakdan ybarat.

Awgust aýynyň başynda Harbin şäherinde figuralaýyn typmak boýunça okuw-türgenleşik ýygnanyşygy hem tamamlandy. Oňa Türkmenistanyň ýaş figuralaýyn typyjylaryndan ybarat topar gatnaşdy.

Ýurdumyza wekilçilik edýän türgenleriň halkara okuw-türgenleşik ýygnanyşygyna üstünlikli gatnaşmagy hökümet tarapyndan gyşky sport görnüşlerine hemmetaraplaýyn ünsüň we aladanyň berilmegi netijesinde Türkmenistanda gyşky sportuň işjeň we yzygiderli ösýändiginiň aýdyň subutnamasyna öwrüldi. Döredilýän şertler we berilýän goldaw ýaş türgenleriň sport meýdançasynda täze belentliklere ýetmegi üçin giň mümkinçilikleri açýar.