Türkmenistanyň Prezidentiniň ýolbaşçylygynda Türkmenistan öz başlangyçlaryny halkara we sebit guramalarynyň, şol sanda Ykdysady Hyzmatdaşlyk Guramasynyň (YHG) çäklerinde işjeň ilerledýär. Ýurdumyz tarapyndan öňe sürülýän bu başlangyçlar sebit hyzmatdaşlygyny mundan beýläk-de ösdürmäge, söwda-ykdysady gatnaşyklary giňeltmäge hem-de Guramanyň agza döwletleriniň arasynda özara bähbitli hyzmatdaşlygy pugtalandyrmaga gönükdirilendir. Bu barada Türkmenistanyň DIM-niň web-saýtynda habar berilýär.
Şunuň bilen baglylykda, YHG-ä agza döwletleriň arasynda bilelikdäki söwda zolaklaryny döretmek baradaky Türkmenistanyň öňe süren başlangyjyny durmuşa geçirmek boýunça işler dowam etdirilýär. Bu başlangyç söwda-ykdysady hyzmatdaşlygy mundan beýläk-de ösdürmäge hem-de serhetýaka söwda mümkinçiliklerini giňeltmäge gönükdirilendir.
2026-njy ýylyň awgust aýynyň ahyrynda YHG-niň Baş sekretary Asad Majid Hanyň we Türkmenistanyň Eýran Yslam Respublikasyndaky Ilçisiniň Gülistan welaýatyna amala aşyran iş saparynyň çäklerinde birnäçe duşuşyklar we gepleşikler geçirildi. Olaryň dowamynda degişli başlangyjyň mundan beýläk-de durmuşa geçirilmegi bilen bagly meseleler ara alnyp maslahatlaşyldy.
Gepleşikleriň dowamynda Bilelikdäki söwda zolagyny döretmegiň söwda alyş-çalyşyny giňeltmek, üstaşyr gatnawlary artdyrmak, maýa goýum hyzmatdaşlygyny ösdürmek we sebitara özara baglanyşygy pugtalandyrmak arkaly YHG sebitiniň ösüşine möhüm goşant goşup biljekdigi bellenildi.
YHG-niň Baş sekretary Asad Majid Han bilelikdäki söwda zolagyny döretmek baradaky başlangyjyň Guramanyň agza döwletleriniň beýleki serhetýaka sebitleri üçin hem nusga bolup biljekdigini belledi. Şeýle hem bu başlangyjyň durmuşa geçirilmeginiň sebitara özara baglanyşygy pugtalandyrmak, sebit içindäki söwdany giňeltmek we ykdysady integrasiýany ösdürmek boýunça YHG-niň maksatlaryna laýyk gelýändigi nygtaldy.
Türkmenistanyň bu ugurdaky başlangyçlarynyň durmuşa geçirilmegi söwda-ykdysady hyzmatdaşlygyň mundan beýläk-de ösdürilmegine, serhetýaka gatnaşyklarynyň pugtalandyrylmagyna hem-de Ykdysady Hyzmatdaşlyk Guramasynyň agza döwletleriniň arasynda hyzmatdaşlygyň giňeldilmegine ýardam berýär.
