«Arkadag» futbol topary Türkmenistanyň milli futbolynyň taryhyna ýene-de bir ajaýyp sahypany ýazyp, ýurduň çempionatynyň duşuşyklarynda yzly-yzyna 100-nji ýeňşini gazandy. Ýokary liganyň 20-nji tapgyrynyň başga güne geçirilen duşuşygynda Wladimir Baýramowyň şägirtleri paýtagtymyzdaky «Nusaý» stadionynda «Aşgabat» toparyndan 3:0 hasabynda ynamly üstün çykmagy başardylar.
Duşuşykda häzirki çempionlaryň aýdyň artykmaçlygy duýuldy. 19-njy minutda Altymyrat Annadurdyýew hasaby açyp, ýeňiş üçin ygtybarly başlangyjy üpjün etdi. Ikinji ýarymda ýer eýeleri ýeňijiniň kim boljakdygy baradaky ähli sowallara nokat goýdy. 63-nji minutda toparyň esasy hüjümçisi Didar Durdyýew tapawutlanan bolsa, dört minutdan soň Welmyrat Ballakow duşuşygyň gutarnykly hasabyny kesgitledi.
Bu ýeňiş diňe bir şanly 100-nji görkezijisi bilen däl, eýsem, toparyň gazanan täsin netijeleri bilen hem ähmiýetlidir. 2023-nji ýylda esaslandyrylan gününden bäri «Arkadag» topary içerki ýaryşlarda ajaýyp netijeleri görkezýär. Topar çempionatda yzly-yzyna üç möwsümi diňe ýeňişler bilen tamamlady: ilkinji möwsümde 24, ikinji möwsümde 30, geçen möwsümde bolsa 28 ýeňiş gazandy. Häzirki 2026-njy ýyl möwsüminde hem topar täsirli tapgyryny dowam etdirip, eýýäm 18 duşuşykda ýeňiş gazandy.
Soňky ýeňşiniň netijesinde «Arkadag» topary 54 utuk toplap, ýaryş tertibinde ynamly öňdeligi eýeleýär. Ol iň ýakyn yzarlap gelýän «Ahal» (36 utuk) hem-de üçünji orunda barýan «Altyn asyr» (35 utuk) toparlaryndan ep-esli öňde barýar.
Toparyň ýaryşdaky üstünlikleri bilen bir hatarda, hüjümçisi Didar Durdyýew milli çempionatyň iň köp gol geçirýän oýunçylarynyň sanawynda hem öňdebaryjylygyny berkidýär. Hüjümçiniň hasabynda eýýäm 18 gol bar, olaryň üçüsi 11 metrlik jerime urgularyndan geçirildi. Çempionatyň iň netijeli hüjümçileriniň sanawynda ondan soň «Ahal» toparynyň oýunçysy Süleýman Mirzoýew 9 gol (2-si 11 metrlik jerime urgusyndan), şeýle hem «Altyn asyr» toparynyň oýunçysy Röwşengeldi Halmämmedow 8 gol we «Köpetdag» toparynyň futbolçysy Arslan Saparow 8 gol (1-si 11 metrlik jerime urgusyndan) bilen gelýär.
«Aşgabat» topary bilen geçirilen duşuşyk ilkibaşda 12-nji sentýabra meýilleşdirilipdi, ýöne öňünden başga güne geçirildi. Munuň sebäbi «Arkadag» toparynyň sentýabryň ortalarynda başlanjak AFK-nyň 2-nji Çempionlar ligasynyň toparçalaýyn tapgyryna taýýarlyk görmegi boldy. Türkmenistanyň üç gezek çempiony halkara meýdançada ýurdumyzyň adyndan çykyş eder.
Geçirilen bijäniň netijesinde türkmen topary «B» toparçasynda çykyş eder. Onda onuň garşydaşlary Birleşen Arap Emirliklerinden «Al-Jazira», Eýrandan «Gol Gohar» we Bahreýnden «Al-Muharraq» toparlary bolar.
Aziýanyň ähmiýeti boýunça ikinji derejeli topar ýaryşynda jemi 32 topar çykyş eder. Olar Günbatar we Gündogar zolaklarynda dört toparly sekiz toparça bölüner. Her toparçadan iň gowy iki topar utulan-çykdy tapgyryna çykar.
Toparçalaýyn tapgyryň ilkinji duşuşyklary 15 – 17-nji sentýabr aralygynda geçiriler. Halkara futbol ýaryşynyň jemleýji final duşuşygy bolsa 2027-nji ýylyň 15-nji maýynda geçiriler.
