«Garaşsyz, baky Bitarap Türkmenistan – bedew batly at-myradyň mekany» ýylyny Balkan welaýatynyň ussat bakjaçylary ýokary önümçilik görkezijilerine besleýärler. Zähmetsöýer ekerançylar üstümizdäki şanly ýylda 2 müň 620 gektar meýdandan 52 müň 400 tonna bakja hasylyny ýygnap almagy meýilleşdirdiler.
Häzirki wagtda welaýatda bakja önümlerini tabşyrmak boýunça bellenilen meýilnamany üstünlikli ýerine ýetirip, asylly maksatlaryna abraýly hötde gelen zähmetsöýer hasyl ussatlary beýik Garaşsyzlygymyzyň şöhratly 35 ýyllyk baýramyna mynasyp sowgatly barýarlar. Olar häzirki günlerde ekin meýdanlaryndaky gawundyr garpyz hasylyny ýygnamak işlerini gyzgalaňly dowam etdirýärler. Bu möhüm işlere welaýatyň Bereket, Gyzylarbat, Etrek, Esenguly etraplarynyň daýhan birleşikleridir daýhan hojalyklarynyň tejribeli daýhanlary, mülkdarlary we ýer eýeleri saldamly goşantlaryny goşýarlar.
Berkarar döwletiň täze eýýamynyň Galkynyşy döwründe Günbatar sebitimizde ata-babalarymyzyň asyrlar aşyp gelýän daýhançylyk däplerine, ekerançylyk ýörelgelerine, halypa-şägirtlik gatnaşyklaryna eýerilip, nusgalyk ösüşlere, guwandyryjy sepgitlere ýetilýär. Mundan başga-da bu sebitde behişdi nygmatlary ösdürip ýetişdirmekde ýaş hem ussat daýhanlaryň uly toparynyň kemala gelendigini nygtap geçmek has-da ýakymlydyr.
Welaýatyň subtropik zonasynda ýerleşýän Magtymguly, Etrek etraplarynyň bagbanlary nar, injir, hoz, zeýtun... ýaly birnäçe miweleri ýetişdirmekde adygan bolsalar, Günbatar sebitiň beýleki etraplarynyň daýhanlary-da bakja önümlerini ösdürip ýetişdirmekde kämil tejribeler topladylar. Balkanly hasyl ussatlary jennetiň nygmaty hasaplanýan gawunlaryň waharman, gyzyldepe, gülaby, garrygyz ýaly birnäçe görnüşinden ýylyň-ýylyna bereketli hasyl alýarlar. Bakjaçylykda, esasanam, gawundyr garpyzyň, miweleriň dürli görnüşlerini ýetişdirmekde, olardan ýokary hilli, bol hasyl almakda, önümleri gaýtadan işlemekde gazanylýan netijeler aýratyn bellenilmäge mynasypdyr.
Şu günlerde bolsa zähmetsöýer daýhanlaryň, mülkdarlaryň, ýer eýeleriniň Garagum derýasynyň boýundaky ekerançylyk meýdanlarynda amala aşyrýan köpugurly işleri-de belent sepgitleriň gazanylýandygyna doly güwä geçýär. Diýarymyzda azyk önümleriniň bolçulygyny döretmek, ak bazarlary, söwda nokatlaryny gök-bakja, miwe önümleri bilen dolduryp, ilatymyza elýeterli bahalardan ýetirmekde welaýatyň bakjaçylary mynasyp işleri bitirýärler. Olar özleriniň ýetişdiren ekologik taýdan arassa, bäsleşige ukyply önümlerini ýurdumyzyň ak bazarlaryna, söwda nokatlaryna dessine ugradyp, içerki sarp edijilere yzygiderli ýetirýärler. Arzyly, islegli önümler, süýji nygmatlar hem döwletli Diýarymyzda tutulýan toýlardyr baýramçylyk dabaralarynyň hem-de ilatymyzyň saçaklarynyň bezegine, berekedine öwrülýär.
