Häzirki wagtda Samarkantda dowam edýän 46-njy Bütindünýä küşt Olimpiadasynda Türkmenistanyň erkekler ýygyndy topary dördünji gezek ýeňiş gazandy. Altynjy tapgyrda türkmen küştçüleri ilkinji üç tagtada halkara grossmeýsterler, dördünji tagtada bolsa halkara ussatlary reýtingde 25-nji orny eýeleýän Daniýanyň toparyny 3,5:0,5 hasabynda utdular.
Birinji tagtada oýnan grossmeýter Saparmyrat Atabaýew (reýtingi 2503) grossmeýster Jonas Bull Býerre (2615) bilen deňme-deň oýnady, beýleki tagtalarda bolsa türkmenistanlylar üç oýunda ýeňiş gazandylar: halkara grossmeýster Meýlis Annaberdiýew (2384) grossmeýster Ýesper Sondergaard Týubony (2579) utdy, FIDE ussady Amanmuhammet Hommadow (2389) grossmeýster Börn Moller Oksnerden (2478) üstün çykdy, Wepaly Halnyýazow (2257) bolsa halkara ussat Filip Boe Olseni (2453) utdy.
Şu ýerde bir bellemeli zat bar – yzly-yzyna dört oýunda ýeňiş gazanan Meýlis Annaberdiýew mümkin bolan 5 utukdan 4,5 utuk toplady. Onuň ýaryşdaky görkezijisi 2788. Wepaly Halnyýazow üç oýunda-da ýeňiş gazandy (görkezijisi 2865), Amanmuhammet Hommadow bolsa mümkin bolan 6 utukdan 4,5 utuk toplady.
Altynjy tapgyrda Türkmenistanyň zenanlar topary Ispaniýanyň topary (belgisi 19) bilen 2:2 hasabynda deňme-deň oýnady, bu toparyň küştçüleriniň dördüsiniň hem halkara ussat we zenan grossmeýster diýen atlary bar. Türkmenistanyň 2026-njy ýyl çempiony we FIDE ussady Läle Şöhradowa (2147) birinji tagtada halkara ussat Marta Garsiýa Martin (2349) bilen deňme-deň oýnady, FIDE ussatlygyna dalaşgär Leýla Şöhradowa (2101) bolsa ikinji tagtada halkara ussat Sabrina Wega Gutýerres (2363) bilen ylalaşyga geldi. FIDE-niň zenan ussady Jahan Rejebowa üçünji tagtada halkara ussat Anna Matnadze Bujiaşwilliden (2302) asgyn geldi. Mähri Agamyradowa (1939) bolsa dördünji tagtada atly garşydaşy, zenan grossmeýster Monika Kalsetta Rusdan (2181) yzly-yzyna üç gezek üstün çykdy.
Mähri Agamyradowa Olimpiadanyň milli ýygyndy toparyň düzümindäki açyşy boldy. Ol 2382 görkeziji bilen mümkin bolan 5 utukdan 4,5 utuk toplady we 100-den gowrak reýting utuklaryny gazandy.
Alty tapgyrdan soň, Türkmenistanyň erkekler topary 206 toparyň arasynda 25-nji, zenanlar topary bolsa 190 toparyň arasynda 26-njy orny eýeleýär. Ýaryşyň başynda erkekler topary diňe 65-nji orunda, zenanlar topary bolsa 55-nji orunda durýardy. Iki topar hem mümkin bolan 12 oýun utuklaryndan 9 utuk gazandy we olaryň hiç biri soňky iki tapgyrda başlangyç sanawda 27–46 orun ýokarda bolan garşydaşlaryndan ýeňilmedi.
Ýatlama: 46-njy Bütindünýä küşt Olimpiadasynda Türkmenistanyň erkekler toparyna Türkmenistanyň at gazanan tälimçisi Serdar Annaberdiýew, zenanlar toparyna bolsa Türkmenistanyň küşt federasiýasynyň baş kätibi Mergen Kakabaýew ýolbaşçylyk edýär.
Onuň sözlerine görä, biziň toparlarymyzyň Olimpiadadaky çykyşy hemmäni haýran galdyrypdyr.
"ýaryş tertibine seretseňiz, başlangyç sany biziňkä deň bolan toparlaryň has aşakda ýerleşýändigini görüp bilersiňiz. Emma biziň toparymyzda bir oýunçy-da arkaýynlaşmaýar we bu netijeleri berkitmek niýetinde" diýip, Mergen Kakabaýew belledi.
Bu Olimpiadada Türkmenistanyň iki ýygyndy topary hem "B" reýting derejesinde çykyş edýärler. Bu toparlar iki ýyl mundan ozal Budapeştde taryhlarynda iň gowy netijelerini gazandylar: erkekler topary "B" derejesinde, zenanlar topary bolsa "C" derejesinde ýeňdi. Küştçülerimiziň Samarkantdaky maksady öz derejesinde ýene-de birinji orny eýeläp, öňki ýeňşi gaýtalamak, şeýle hem halkara ussatlyk ülňülerini ýerine ýetirip, şahsy reýtinglerini ýokarlandyrmakdyr.
