Hormatly Prezidentimiz Serdar Berdimuhamedow Hytaý Halk Respublikasynyň Başlygy Si Szinpine, Döwlet Geňeşiniň Premýeri Li Sýana Hytaý Halk Respublikasynyň döredilen güni mynasybetli tüýs ýürekden gutlaglaryny we iň gowy arzuwlaryny iberdi.

Döwlet Baştutanymyz Hytaý Halk Respublikasynyň döwrebaplaşmagyň hytaý nusgasyndan yzygiderli ugur alyp, özara hormat goýmaga we deňhukukly ýörelgelere esaslanýan ählumumy hyzmatdaşlygy hem-de döredijilikli gün tertibini öňe sürmäge uly goşant goşýandygyny nygtady.

«Türkmenistan Hytaý Halk Respublikasy bilen ynanyşmagyň we özara düşünişmegiň häzirki derejesine ýokary baha berýär. Biziň ýurtlarymyz özara hyzmatdaşlygy iş ýüzünde yzygiderli giňeldýärler, söwda-ykdysady gatnaşyklary pugtalandyrýarlar, energetika, ulag ulgamlarynda we ynsanperwer hyzmatdaşlygy ösdürýärler, halkara giňişlikde konstruktiw dialogy saklaýarlar” diýlip, hatda bellenilýär.

Hormatly Prezidentimiz bilelikdäki tagallalarymyzyň netijesinde türkmen-hytaý hyzmatdaşlygynyň täze mazmun bilen baýlaşdyryljakdygyna ynam bildirdi.

Döwlet Baştutanymyz Serdar Berdimuhamedow mümkinçilikden peýdalanyp, Hytaý Halk Respublikasynyň Başlygy Si Szinpine we Döwlet Geňeşiniň Premýeri Li Sýana berk jan saglyk, bagtyýarlyk, alyp barýan döwlet işlerinde täze üstünlikleri, Hytaýyň dostlukly halkyna bolsa parahatçylyk, rowaçlyk we abadançylyk arzuw etdi.