Mary welaýatynyň merkezinde Oguz han köçesiniň ugrunda Mary şäher 1-nji Saglyk öýüniň açylyş dabarasy boldy. Ulanyşa berilen bu bina welaýatyň saglyk işgärlerine baýramçylyk toý sowgady boldy.
Berkarar döwletiň täze eýýamynyň Galkynyşy döwründe ýurdumyzda saglygy goraýyş ulgamyny ösdürmekde uly işler durmuşa geçirilýär. Gurulýan häzirkizaman saglyk öýleridir hassahanalar muňa doly şaýatlyk edýär. Mary welaýatynda-da saglygy goraýyş ulgamynyň döwrebap desgalarynyň hatary barha artýar.
Bu ulanyşa berlen saglyk öýi dolandyryş, kabul ediş, maslahat beriş-anyklaýyş, fizioterapiýa, barlaghana, bakteriologiýa, şöhle bilen anyklaýyş, ultrases barlag, ehokardiografiýa, elektrokardiografiýa, endoskopiýa, gastroskopiýa, kolonoskopiýa, kolposkopiýa, gündizki bejeriş otaglaryny, şeýle-de ýörite ugurly hünärmenleriň we maşgala lukmanlarynyň otaglaryny öz içine alýar. Otaglarda häzirki zaman barlag we bejeriş işleri geçirilýär. Saglyk öýünde ornaşdyrylan innowasion enjamlar bolsa, ýewropa döwletleriniň belli kompanýalarynyň öňdebaryjy lukmançylyk enjamlary bolup durýar. Dünýä ülňülerine laýyk gelýän häzirki zaman ýokary tilsimatly lukmançylyk enjamlary ýokary takyklygy bilen tapawutlanýan barlaglary gysga wagtda geçirmeklige mümkinçilik berýär. Saglyk öýüniň lukmanlary Mary şäheriniň bu saglyk öýüne berkidilen çägindäki raýatlara saglygy goramak we bejermek hyzmatyny ýerine ýetirerler.
Iki gatdan ybarat Mary şäher 1-nji Saglyk öýüniň düýpli durky täzelenen täze binasy şäheriň binagärlik keşbine has gözellik goşdy. Durky düýpli täzelenen bu saglyk öýüniň binasynyň gurluşyk we abatlaýyş işleri «Yhlasa ynam» hususy kärhanasynyň gurluşykçylary tarapyndan amala aşyryldy.
Saglyk öýüniň mejlisler jaýy bu ýerde lukmanlaryň arasynda dürli çäreleri, maslahatlary geçirmäge zerur enjamlar bilen üpjün edilen. Desganyň daş-töweregi abadanlaşdyrylyp, bag nahallary oturdylypdyr. Yşyklandyryş ulgamynyň döwrebaplygy bolsa, saglyk öýüniň gijeki görnüşini has-da gözelleşdirýär. Saglyk öýüniň hajatlary üçin suw howzy, awtoduralga hem gurnalypdyr.
Saglyk öýüniň ulanyşa berilmegi mynasybetli gurnalan dabara uly toýçy märekäni bu ýere jemledi. Welaýat häkimliginiň hünärmenleri, Türkmenistanyň Mejlisiniň deputatlary, jemgyýetçilik guramalarynyň ýolbaşçylary, ýaşuly nesliň wekilleri, saglygy goraýyş ulgamynyň işgärleri, talyp ýaşlar gatnaşdylar. Bu ýerde edilen çykyşlarda ýurdumyzyň saglygy goraýyş ulgamyny ösdürmekde, ilatymyzyň saglygyny goramakda hormatly Prezidentimiziň, Gahryman Arkadagymyzyň tagallalary bilen alnyp barylýan işler dogrusynda buýsançly çykyşlar edildi. Hut şu saglyk öýüniň durkynyň düýpli täzelenip ulanylmaga berilmegi hem saglyk işgärlerine işlemäge, raýatlarymyza bolsa döwrebap şertlerde saglyklaryny bejermäge döredilýän amatlyklardan habar berýär.
Bu ýerde medeniýet we sungat işgärleriniň, bagtyýar körpeleriň joşgunly çykyşlary, döwrebap tanslary, dabara gatnaşyjylaryň baýramçylyk buýsanjyny belende göterdi. Dabaranyň iň şatlykly we tolgundyryjy pursady binada zähmet çeken gurluşykçylara hormatly Prezidentimiziň adyndan sowgatlaryň gowşurylmagy boldy. Şonuň ýaly-da Mary şäher 1-nji Saglyk öýüne hormatly Prezidentimiziň adyndan «Mercedes-Bens» kysymly rentgenflýurografiýa enjamy oturdylan göçme lukmançylyk awtoulagy sowgat gowşuryldy.
