2026-njy ýylyň 20-nji oktýabrynda Türkmenistanyň Ministrler Kabinetiniň Başlygynyň Orunbasary H.Geldimyradow Şanhaý Hyzmatdaşlyk Guramasyna (ŞHG) agza döwletleriň Hökümet Baştutanlarynyň Geňeşiniň giňeldilen mejlisine gatnaşdy. Duşenbe şäherinde geçirilen mejlisde ol çagyrylan döwletiň wekili hökmünde hormatly myhman derejesinde çykyş etdi. Bu barada Türkmenistanyň DIM-niň web-saýtynda habar berilýär.
Mejlisiň dowamynda sebit hyzmatdaşlygynyň möhüm meseleleri boýunça pikir alşyldy, şeýle hem söwda-ykdysady, ulag-logistika, energetika we beýleki ugurlarda amaly hyzmatdaşlygy mundan beýläk-de giňeltmegiň mümkinçiliklerine garaldy.
Özara bähbitli ykdysady gatnaşyklary ösdürmek, ulag arabaglanyşygyny pugtalandyrmak we sebitiň durnukly ösüşini üpjün etmäge gönükdirilen bilelikdäki başlangyçlary durmuşa geçirmek meselelerine aýratyn üns berildi.
Türkmenistanyň bu çärä gatnaşmagy ýurduň sebit döwletleri bilen netijeli dialogy ösdürmäge, özara hormat goýmak we ähli taraplaryň bähbitlerini nazara almak ýörelgeleri esasynda halkara hyzmatdaşlygyny giňeltmäge ygrarlydygyny görkezýär.
