Maýa Kulyýewa adyndaky Türkmen milli konserwatoriýasynyň kiçi zalynda «Karaoke» konsert bäsleşigi geçirildi. Ol estrada sungaty bölüminiň bir hepde dowam eden konsertlerini jemlän ahyrky çykyş boldy.

Bäsleşige her biri alty adamdan ybarat dört topar gatnaşdy. Olar Arkadag şäheriniň ýöriteleşdirilen sazçylyk mekdebiniň okuwçylary (1-nji topar), Ahal welaýat sazçylyk mekdebiniň okuwçylary (2-nji topar), Maýa Kulyýewa adyndaky Türkmen milli konserwatoriýanyň aşaky synp talyplary (3-nji topar) we ýokary synp talyplary (4-nji topar).

Zalda Atajan Berdiýew, Atabaý Çarygulyýew we Akyş Saparow ýaly tanymal aýdymçylaryň aýdan türkmen we daşary ýurt kompozitorlarynyň meşhur aýdymlary ýaňlandy. Özbek aýdymçysy Firýuza Jumanyýazowanyň, türk aýdymçysy Ibrahim Tatlysesiň, şeýle hem Waleriý Meladzaniň, Filip Kirkorowyň, Maksimiň we başga-da birnäçe aýdymçynyň aýdymlary-da ýerine ýetirildi. «Gündogar ertekileri» aýdymynyň tomaşaçylar we bäsdeşler bilen bilelikde aýdylmagy bellenilmäge mynasyp ýagdaýdyr.

Konserti alypbaryjy, estrada sungaty bölüminiň müdiri Maýsa Mämmetjumaýewa bäsleşik tapgyrlaryny yglan edýärdi. Konsert toparlaýyn çykyş bilen açyldy. Soňra toparbaşylary çykyş etdiler, yzýany bolsa olaryň bilelikdäki çykyşy boldy. Soňky tapgyrda her toparyň ýekelikde aýdýan aýdymçylary çykyş etdiler. Çykyşlara eminler 10 dereje boýunça baha berdiler.

Garaşylyşy ýaly, konserwatoriýanyň ýokary synp talyplarynyň topary ýeňiş gazandy.

Karaoke – ýaşlaryň göwnünden turýan gyzykly bäsleşik. Geljekki estrada artistleri üçin bolsa bu, mundan daşgary, öz ussatlygyňy ösdürmek üçin, ýagny täze aýdymyň depginine çalasyn geçmek, meşhur artistiň diňe bir sesini meňzetmek däl, eýsem, sahnada çykyşyny hem gaýtalamak, şeýle hem häzirki zaman estrada eserleriniň repertuary baradaky bilimlerini giňeltmek üçin ajaýyp mümkinçilikdir.

«Karaoke» konsert bäsleşiginiň estrada sungaty bölüminiň döredijilik hepdeligini jemländigini ýatladýarys. Bu günlerde talyplar meşhur «Güneş», «Dessan» we «Pöwrize» toparlarynyň aýdan aýdymlary, şeýle hem Akmuhammet Saparowyň, Bibi Welmyradowanyň, Öwezgeldi Tekäýewiň, Annaberdi Atdanowyň we türkmen estradasynyň beýleki ussatlarynyň aýdymlaryny ýerine ýetirdiler.