Türkmenistanyň wise-çempiony «Ahal» toparynyň futbolçylary 2026/27-nji ýyl möwsüminiň AFK-nyň Çagyryş ligasynyň toparçalaýyn tapgyrynyň soňky duşuşygynda Liwanyň häzirki çempiony «Al-Ansar» toparyny 2:1 hasabynda utdy.
Duşuşyk Günbatar zolagyň «A» toparçasynyň oýunlary merkezleşdirilen görnüşde geçirilýän ýeri bolan Butanyň paýtagty Thimphuda geçdi. Gyrgyzystanly FIFA emini Sanjar Žakypbekowyň ýolbaşçylygyndaky toparyň gözegçilik eden oýnuna 506 adam tomaşa etdi.
Duşuşykdan öň toparlar ýaryş tertibinde dürli orunlary eýeleýärdiler. Butanyň «Paro» topary bilen 2:2 hasabynda deňme-deň oýnandan we Siriýanyň «Al-Ittihad» toparyndan 5:1 hasabynda ýeňlenden soň, diňe bir utugy bolan «Ahal» topary Butanyň çempiony bilen 3 – 4-nji orunlara şärik bolupdy. Liwanyň iň abraýly topary bolan Beýrutyň (16 gezek Premýer-ligada ýeňiş gazanan, 16 gezek Milli Kubok gazanan we yzly-yzyna 11 gezek çempionlyk gazanan) «Al-Ansar» topary bolsa Siriýanyň «Al-Ittihad» (2:0) we Butanyň «Paro» (2:1) toparlaryny ýeňip, öňdäki orny ynamly eýeleýärdi.
Türkmen topary oýna işjeň başlady: eýýäm bäşinji minutda Begenç Mämiýew topy 20 metrden derwezä tarap urdy. Top derwezäniň direginiň bir santimetr daş ýüzünden geçdi, üç minutdan soň bolsa Oraz Orazow burç urgusyndan gelen topy kellesi bilen derwezä tarap urdy. Top derwezäniň uzaboýuny syryp geçip gitdi.
Liwanlylar 19-njy minutda Majed Osmanyň howply urgusy bilen jogap berdiler, ýöne «Ahal» toparynyň derwezeçisi Wepa Mammaýew jaýdar böküp, topy derwezäniň üstünden aşyrdy. Mammaýew soňra Nader Mataryň uzak aralykdan uran toplaryny gaýtarmak bilen, topary ýene birnäçe gezek halas etdi.
Birinji ýarymyň iň netijeli pursady 44-nji minutda geldi: «Al-Ansar» toparynyň goragçysy Rafik Mednini öz jerime meýdançasynda topa elini degirdi. Emin jerime urgusyny yglan etdi, urgyny Begenç Mämiýew ynam bilen amala aşyrdy. «Ahal» topary 1:0 hasabynda öňe çykdy.
Ikinji ýarym başlanan dessine, Enwer Annaýewe hasaby iki esse artdyrmaga mümkinçilik boldy, emma beýrutlylaryň derwezeçisi Hadi Kanj aýaklary bilen topary halas etdi. «Al-Ansar» topary 63-nji minutda hasaby deňledi: Majed Osman Mahdi Al-Zainiň takyk beren topuny sowukganlylyk bilen ýokarky burça gönükdirmek bilen, hasaby 1:1 etdi.
Eýsem-de bolsa, «Ahal» topary gaýduwsyzlyk görkezip, galan wagtda ýeňiş gazandy. 77-nji minutda Süleýman Mirzoýew sag ganatdan jerime meýdançasyna kürsäp girdi-de, topy Ýakupmuhammet Gowşudowa geçirdi, ol bolsa topy derwezeçi meýdançasyndan goragsyz burça urup, hasaby 2:1 etdi.
Ýeňşe garamazdan, «Ahal» toparyna toparçasyndan çykmak üçin, utuk sany ýetmedi. 6 utugy bolan liwanly «Al-Ansar» birinji orunda galyp, çärýek finala çykdy.
Şol bir wagtda bolup geçen duşuşykda Siriýanyň «Al-Ittihad» topary «Paro» toparyny 2:1 hasabynda ýeňip, toparda ikinji orny eýeledi. Siriýanyň topary alty utuk bilen Günbatar zolakda ikinji orny eýelänleriň arasynda iň gowy topar boldy, şeýle hem utulan-çykdy tapgyryna gatnaşmaga hukuk gazandy.
2026/27-nji ýyllaryň AFK-nyň Çagyryş ligasynyň toparçalaýyn tapgyryna gatnaşan 19 toparyň ählisiniň-de Aziýa Futbol konfederasiýasyndan 100 müň Amerikan dollar aljagyna kepil bar.
AFK-nyň Çagyryş ligasy ähmiýeti boýunça Aziýada üçünji topar ýaryşy bolmak bilen, AFK-nyň Çempionlar ligasyna we AFK-nyň 2-nji Çempionlar ligasyna gatnaşmadyk toparlar üçin döredildi. Toparçalaýyn tapgyryň netijeleri boýunça, çärýek finalda kimiň kim bilen oýnajakdygy kesgitlendi. Olaryň oýunlary öz meýdançalarynda we myhmançylykda geçer.
Günbatar zolagy (ilkinji duşuşyklar 2027-nji ýylyň 3-nji marty aýynda, jogap duşuşyklary 17-nji marty aýynda).
«Al-Ittihad» (Siriýa) – «Homs Al-Fidaa» (Siriýa)
«Al-Ansar» (Liwan) – «Al-Kadsiýa» (Kuweýt).
Gündogar zolagy (ilkinji duşuşyklar – 2027-nji ýylyň 11-nji marty aýynda, jogap duşuşyklary 18-nji marty aýynda).
«Shan Ýunaýted» (Mýanma) – «Borneo» (Indoneziýa).
«Tainan Sity” (Hytaý Taýbeýi) – «Manila Digger» (Filippinler).
Günbatar sebitde ýarym finalyň ilkinji duşuşyklary 2027-nji ýylyň 7-nji apreli aýynda, jogap duşuşyklary bolsa 14-nji apreli aýynda geçiriler. Gündogar sebitdäki duşuşyklar 8-nji we 15-nji aprelde geçiriler.
Baýraklar ugrundaky soňky duşuşyk 2027-nji ýylyň 8-nji maýy aýynda bolar.
Ýatlatma: 2024/25 möwsüminiň ilkinji AFK-nyň Çagyryş ligasy ýaryşynda Türkmenistanyň «Arkadag» futbol topary ýeňiş gazanypdy, 2025/26 möwsüminde bolsa Kuweýtiň häzirki çempiony «Al-Kuweýt» baýrak aldy.
