Aşgabatda Garaşsyz Döwletleriň Arkalaşygyna agza döwletleriň Medeni hyzmatdaşlyk boýunça geňeşiniň mejlisi geçirildi. Onuň dowamynda umumy taryhy-medeni mirasy gorap saklamak we ynsanperwer gatnaşyklary pugtalandyrmak meselelerine aýratyn üns berildi.
Duşuşyga gatnaşyjylaryň öňünde çykyş eden Türkmenistanyň medeniýet ministri Gurbanmyrat Myradalyýew Aşgabadyň GDA agza ýurtlaryň halklarynyň umumy medeni hazynasynyň aýrylmaz bölegini düzýän baý medeni mirasyny gorap saklamaga we giňden wagyz etmäge uly ähmiýet berýändigini belledi.
«Medeniýet milli özboluşlylygy gorap saklamagyň, halklaryň arasynda özara düşünişmegi pugtalandyrmagyň we GDA giňişliginde ynsanperwer hyzmatdaşlygy ösdürmegiň möhüm şertleriniň biridir» diýip, ministr belledi.
Mejlisiň çäklerinde G. Myradalyýew Aşgabadyň medeni-ynsanperwer ulgamda döwletara hyzmatdaşlygy mundan beýläk-de çuňlaşdyrmaga ygrarlydygyny tassyklady.
Hyzmatdaşlygyň ileri tutulýan ugurlarynyň hatarynda teatr, saz we şekillendiriş sungaty ugurlarynda tejribe alyşmagy giňeltmek, zehinli döredijilik toparlaryny we geljegi uly ýaşlary goldamak, halklaryň ýakynlaşmagyna hem-de hoşniýetli goňşuçylyk gatnaşyklarynyň pugtalandyrylmagyna gönükdirilen bilelikdäki medeni taslamalary durmuşa geçirmek bellenildi.
