Gyrgyzystan Respublikasynyň paýtagty Bişkek şäherinde “alyş” (guşakly) göreş boýunça geçirilen dünýä çempionatynda türkmen pälwanlary medallaryň üçüsine mynasyp boldular. Başa-baş göreşiň bu görnüşi türkmen milli göreşi bilen kysymdaş hasap edilýär.

Agram derejeleriniň ýedisi boýunça ýigrimi ýurduň wekilleri bäsleşdiler. Türkmen pälwanlarynyň arasynda 100 kilogramdan ýokary agram derejesinde Milli sport we syýahatçylyk institutynyň talyby, halkara derejeli sport ussady M. Jumaýew kümüş medala mynasyp boldy.

Şol ýokary okuw mekdebiniň talyplarynyň ýene ikisi, halkara derejeli sport ussatlary Ý. Annamyradow (62 kilograma çenli) we K.Jumaýew (90 kilograma çenli) bürünç medallara mynasyp boldular.

Biziň ildeşlerimiziň dünýä çempionatynda gazanan bu medallary Watanymyzyň Garaşsyzlygynyň şanly 20 ýyllygyna oňat sowgat boldy. Şeýle iri halkara bäsleşiklerinde türkmen pälwanlarynyň gazanan ajaýyp üstünligi Türkmenistanyň Prezidenti Gurbanguly Berdimuhamedowyň ýurdumyzda bedenterbiýäni we sporty ösdürmäge ähli çäreler arkaly goldaw bermek, ýaş nesliň beden taýdan sagdyn ösüşi we sport ussatlygyny kämilleşdirmek üçin zerur şertleri döretmek syýasatynyň kanunalaýyk netijesidir.