Uşu boýunça ussat türkmen türgenleri Germaniýanyň paýtagtynda sportuň bu görnüşi boýunça Ýewropa federasiýasynyň howandarlygy astynda geçirilen Berliniň açyk çempionatynda dürli derejedäki medallaryň 13-ne mynasyp boldular. Bäsleşiklere 12 ýurduň-Belarusyň, Germaniýanyň, Italiýanyň, Kolumbiýanyň, Gazagystanyň, Norwegiýanyň, Rumyniýanyň, Russiýanyň, Ukrainanyň, Çehiýanyň, we Şweýsariýanyň türgenleri gatnaşdylar.Türgenler ýaş aýratynlygy boýunça bäş topara bölündi.

Türkmenistanyň uşu boýunça milli federasiýasynda tälim alan türkmen türgenleri ýakyn aragatnaşykda geçirilen başa-baş bäsleşikde-uşu-sanşou boýunça üstünlik gazandylar. Altyn medallaryň 4-sini B.Babaýew, R.Rahymow, Ç.Tagangylyjow G.Jumanyýazow aldylar. Kümüş medallara B.Orazmämmedow, A.Durdyýew, sport we syýahatçylyk milli institutynyň talyplary W.Ýazberdiýew, I.Nuryýew, gyzlaryň arasynda bolsa A.Rahymowa we D.Amandurdyýewa mynasyp boldular. M.Baýramow, K.Ýazgulyýew we Türkmen politehniki institutynyň talyby B.Gulhanow bürünç baýraklary eýelediler.

Türgenleri bu ýaryşlara ýurdumyzyň ýygyndy toparynyň uly tälimçisi we uşu boýunça Türkmenistanyň milli federasiýasynyň başlygy Ý.Annamyradow taýýarlady.