Tähranda geçirilen halkara ýaryşynda türkmen dzýudoçylary bir altyn, bir kümüş we iki sany bürünç medallara mynasyp boldular. Bu ýaryşa dokuz ýurtdan, şol sanda Azerbaýjandan, Owganystandan, Yrakdan, Eýrandan, Liwandan, Pakistandan, Siriýadan, Täjigistandan türgenler gatnaşdylar.

Türkmenistanyň toparyndan iň ýokary münbere M.Artykow (60 kilograma çenli agramda) çykdy. Ol bu üstünlige dört ýeňiş gazanyp mynasyp boldy. Şu agramda ýene-de biziň bir ildeşimiz – A.Ergeşow – bürünç medaly eýelemegi başardy.

90 kilograma çenli agramda türkmen türgeni N.Ýalkabow üç duşuşykda özüniň bäsdeşlerinden üstün çykmagy başaryp, kümüş medala mynasyp boldy. Biziň toparymyzdan ýene-de bir sylagy – bürünç baýragy S.Jummyýew (81 kilogram agramda) gazanmagy başardy.

Baýraklara eýe bolanlaryň ählisi Türkmen Milli sport we syýahatçylyk institutynyň talyplarydyr. Bu ýaryşa olar tälimçiler ussat dzýudoçylar – T.Amandyrdyýewiň we G.Nurmuhammedowyň ýolbaşçylygynda taýýarlyk gördüler.