Russiýanyň, Türkiýäniň, Gazagystanyň, Gyrgyzystanyň, Täjigistanyň, Özbegistanyň we Türkmenistanyň tennisçileriniň 18 ýaşdan uly bolmadyk wekilleriniň 100-e golaýy türkmen paýtagtynda ýygnandy, bu ýerde tennis boýunça «Ashgabat Сup» halkara ýaryşy başlyndy. Ony Türkmenistanyň Sport baradaky döwlet komiteti, Milli tennis merkezi we Aşgabat şäheriniň häkimligi gurady. Bu bäsleşikler mähriban Watanymyzyň Garaşsyzlygynyň 21 ýyllygy mynasybetli geçirilýär.

Geçen ýyldan başlap Halkara tennis federasiýasynyň (ITF) senenamasyna goşulan bu ýaryşyň açylyş dabarasy şu gün paýtagtymyzdaky köpugurly «Aşgabat» stadionynda geçirildi. Ýaryşy gatnaşyjylaryň gelşikli hatarlary bäsleşikleriň açylyş dabarasyna garaşyp durlar. Türkmenistanyň Döwlet senasy ýaňlanýar. Şeýlelikde ýaryş açyk diýlip yglan edilýär. Paýtagtymyzyň aýdym-saz toparlarynyň tomaşalary, sport mekdepleriniň ýaşajyk türgünleriniň görkezme çykyşlary, akrobatika, çeper gimnastika, tigirçeklerde typmak boýunça guralan tomaşalar dabara baýramçylyk öwüşginini çaýýar.

«Ashgabat Сup» Halkara tennis ýaryşy indi ikinji gezek geçirilýär. Ýöne şu gysga döwrüň içinde biziň ýurdumyzda geçirilýän ýaryşa gatnaşmaga höwes bildiren daşary ýurtly türgenleriň sany artdy. Şu ýyl Gyrgyzystandan we Täjigistandan gelen tennisçiler bu ýaryşda birinji gezek çykyş edýärler.

Şu gün «Aşgabat» stadionynda ITF-niň bäşinji derejesiniň ýetginjekler ýaryşyna badalga berildi. Türkmen tennisçileriniň arasynda ýaryşyň ikinji aýlawyna I. Mämmetgulyýew we I. Barzasekow düşmegi başardylar. Olar Gazagystanyň wekilleri A. Gorelowdan we K. Ažarkenowdan üstün çykmagy başardylar. Gyzlaryň arasynda ýekelikde geçirilen ýaryşda S. Akaýewadan üstün çykan J. Baýramowa ýaryşyň ikinji aýlawyna çykdy.

Ertir bäsleşikler dowam eder. Biziň tennisçilerimiziň arasynda Türkmenistanyň birinji raketkasy hasaplanýan A. Ärnepesow özüniň ilkinji oýnuny geçirer. Onuň bäsdeşi özbegistanly tennisçi A.Baltabaýew bolar.

Aşgabat Kubogyna mynasyp bolanlar 22-nji sentýabrda geçiriljek final oýlarynyň netijsi boýunça belli bolar.