Türkmenistanyň Ylymlar akademiýasynyň Botanika bagynda sport egin-başlaryny geýen ylymlaryň doktorlarynyň, ylymlaryň kandidatlarynyň, aspirantlaryň, laborantlaryň we beýleki hünärmenleriň 120-den gowragy ýygnandy. Bu ýerdeTürkmenistanyň Ylymlar akademiýasynyň we oňa degişli guramalaryň 11-siniň alymlary sportuň dürli görnüşleri boýunça güýç synanyşdylar.


Bu çäräni ylmy-barlag institutlarynyň üçüsiniň: botanika, derman ösümlikleri we seýsmologiaý institutlarynyň işjeň hünärmenleri guradylar. Ylgamak boýunça 100 metr aralyga geçirilen bäsleşikde Magtymguly adyndaky dil we edebiýat institutynyň işgärleri ýeňiş gazandylar. Tanap çekmek boýunça topralaýyn bäsleşikde Botanika institutynyň işgärlerine taý gelen bolmady. Dartsu boýunça geçirilen bäsleşikde Seýsmologiýa institutynyň işgärleri ýokary netije görkezmegi başardylar. 15 kilogram agramdaky sport daşyny götermekde Taryh institutynyň işgäri, 20 kilogramlygy götermekde bolsa, Botanika institutynyň işgäri ýeňiş gazandy.

Şol wagt Derman ösümlikleri institutynň işgär zenanlary bodminton boýunça geçirilen bäsleşikde Arheologiýa we etnografiýa institutynyň işgärlerini ýeňmegi başardylar. Akademiýanyň Merkez ylmy kitaphanasynyň we „Gün“ institutynyň küştçileri özlerini iň güýçli hökmünde görkezmegi başardylar.