Şekillendiriş sungaty muzeýinde Aşgabat şäheriniň gününe bagyşlanan sergi açyldy. Ýurduň her bir raýaty paýtagtymyzyň çalt depginlerde ösüşine buýsanýar, bu ýagdaý daşary ýurtly myhmanlary geň galdyrýar we haýrana goýýar. Ýalpyldaýan mermer binalar köplenç žiwopis eserlerinde esasy orun tutýar.

Ýaş nakgaş Annamyrat Orazow “Abadançylygyň Watany” atly şäher manzaryny özboluşly şekillendiripdir. Paýtagtyň işewürlik böleginiň binalar toplumy Köpetdagyň belent gerişleriniň öňünde Türkmenistanyň Baş baýdagy meýdançasynyň gapdalynda ýaly çekilipdir.

Saparmämmet Meredowyň “Altyn çüýz” işinde türkmen paýtagtynyň üçünji müňýyllygyň şäherine öwrülişi görkezilýär. Suratyň baş gahrymanlary – äpet kranlardyr. Suratyň manzary keşbi çalt depginlerde özgerýän paýtagtyň ýaşaýjylary üçin adaty ýagdaý bolsa-da, onuň manysy gatbar-gatbar ýaly duýgy döreýär. Kranlaryň aňyrsynda ak mermer kaşaň jaýlar bar, aşagynda-- täze jaýlar gurulýar, ondan aşakda bolsa, öz daş keşbinden utanýan ýaly köne palçyk jaýlar daragtlaryň altynsow ýaprakly pürleriniň arasynda gizlenip otyr. Surat adyna muwapyk ohra reňk öwüşginlerinde berlipdir.

Sadap Hojagulyýewa suratyny agşamky Aşgabada bagyşlapdyr, onda çyaralaryň müňlerçesiniň döredýän yşyk dizaýny gijeki ajap şäheri ýyldyzly asmana meňzedýär.

Begenç Berkeliýewiň “Awtomobiliň penjiresinden” atly suraty köp görkezilýär. Nakgaşyň üýtgeşik bu işi sazlaşyga ýugrulan, oňa syn edeniňde özüňi awtomobiliň içinde ýaly duýýarsyň. Onda şäheriň gözel ýerleri görkezilýär.

Sergide nakgaş Begenç Berkeliýewiň türkmenistanlylaryň belleýän baýramynyň temasyna bagyşlanan iki işi goýlupdyr. “Atam-- ekskawatorçy” suratynyň gahrymanlary atasy we onuň agtygy. Oglanjyk ekskawatoryň dolandyryş guralyny çynlakaý keşbe girip, dogumly tutup dur, atasy bolsa ýylgyryp oňa syn edýär. Atasy, agtygy we tomaşaçylar täze gözel binanyň düýbüniň tutulyşyna syn edýärler.

Temany muzeýiň gorundan alnan Nikolaý Çerwýakowyň “Kakam günorta naharyna çykdy” atly suraty dowam edýär. Maşgalabaşynyň ýanyna gelen aýalydyr ogly ekskawatoryň susgyjynda ymykly ornaşyp, onuň bilen bile nahar edinýärler. Surat maşgala, zähmete we Aşyklar şäherine söýgüni beýan edýär.

“Ak şäherim Aşgabat” sergisi žiwopisde şäher manzaryny halaýanlaryň ünsüni çekse gerek. Mundan başga-da, ol ýurdumyzyň baş şäheriniň gözelligine buýsanmaga mümkinçilik berýär.