Paýtagtymyzyň Sergi merrkezinde Türkmen bedewiniň milli baýramy mynasybetli türkmen nakgaşlarynyň işleriniň sergisi açyldy. Asyrlarboýy türkmen halkynyň buýsanjy bolan owadan bedewleriň şekili merkeziň iki gatyna-da bezeg berdi. Nakgaşlaryň her biri bu tema özboluşly çemeleşipdir. Sergide art-modern stilinde, kiçi heýkellerde, esasan realistik äheňde ýerine ýetirilen işler kändi.
Suratlara syn etdigiňçe atyň türkmeniň durmuşynda uly orun tutandygyna düşünýärsiň. Bedewler adamlar bilen birlikde hem söweş meýdanynda jeňe girdiler, hem ýaryşlarda ýeňiş gazandylar. Indi aty ulag hökmünde ulanmak zerurlygy ýok, ýöne olar atçylyk sportunda juda nepisligi bilen ildeşlerimizidir myhman-gonaklary haýran edýär.
Nakgaş R. Garryýew «Aýly agşam» suratynyň gahrymany atyny syrdaş edinipdir.Ýigit duwala atly gelýär, onuň bäri çetinde çekinjeň magşugy elini döşüne gysyp dur. Olaryň söýgüsi ýaňy başlan borly. Aşyklaryň ýürekleriniň howsalasyyny syzgyr tomaşaçy-da duýýan ýaly duýgy döreýär.
Ýagşymyrat Kerimow bilen Çary Jafarow söweş sahnalaryndan iki surat goýupdyrlar. Ýagşymyrat «Alp Arslan» atly işinde söweşde duşmanyndan rüstem çykan serdary şekillendirse, Çary «Jelaletdin» atly suratynda wepaly nökerleriniň arasynda duşman ýerleşen alys ýerlere syn edip, geljekki söweşiň pikirini edýän zehinli serkerdäniň keşbini çekipdir.
Suratlaryň ikisinde-de at eýesiniň ýeňşini-ýeňlişini deň paýlaşýar.
Rustam Abdullaýewiň «Saba-säher ýyldyzy» suratyndaky atlar eýýäm başga iş edýärler: olar agzybir maşgalany bir ýerden başga ýere göçürýärler. Bu surat nakgaşyň alys ýola düşn bagtyýar maşgalany, oňa ýol aşmaga oňa ýardam edýän wepaly dosty, maşgala agzasyna öwrülen aty şekillendirýän suratlar tapgyryndan biridir. Surat türkmenleriň göçegçi durmuşynyň beýanydyr. Rustam her işinde tebigat gözelligini we maşgala bagtyýarlygyny çeper beýan edýär.
Gahryman Goçmyradowyň «Ak bedewiň üstünde» atly işi hiç kimi biparh goýmaýar. Nakgaş onda ýigidiň söwerini alyp gaçýan pursadyny şekillendiripdir. Ýigit yzyndan kowýanlara ýaý atsa, eýesiniň ykbalynyň we onuň söýgüsiniň diňe öz ýüwrükligine baglydygna gowy düşünýän bedew misli uçup barýan ýaly görünýär. Diňe saçlary şemala ýaýylyp duran gyz ýüregi heýjana gelýär. Ol, hamala: «Men neneň uzak garaşdym bu pursada!» - diýýän ýaly görünýär.
Sergi tomaşaçylarda uly gyzyklanma döretdi. Eserleriň awtorlary bolsa öz göwnüne ýaran işler barada pikir alyşýardylar, olar azam däldi.
