Türkmenistanyň Alp Arslan adyndaky milli drama teatrynyň sahnasynda «Yşk mekany  ̶ Hindistan» spektaklynyň premýerasy şowly geçdi. Täze tomaşany Türkmenistanyň at gazanan artisti Handurdy Berdiýew sahnalaşdyrdy.

Gadam Kakabaýewiň adybir eseriniň esasynda goýlan spektakl durmuş deňsizligi, «atalar we çagalar» meselesi ýaly wajyp temany gozgaýar. Şeýle hem, gahrymanlaryň mysalynda özara düşünişmäge ýol tapmagy, birek-birege hormat-sarpany we Mahatma Gandiniň filosofik pikirleri ruhunda özge garaýyşlylara sabyr-takatlylygy öwredýär.

Spektaklyň ýordumy sadadan düşnükli. Barjamly ýerden çykan ýigit Ýewropada uzak ýyllar okap, dogduk iline dolanyp gelensoň, kakasynyň öýünde işleýän sadaja ýaş hyzmatkär gyz bilen tanyşýar.

Bir bakyşda biri-birine aşyk bolan Sanjeý (Süleýman Eminow) we Ratha (Jennet Horasanlyýewa) her hili kynçylyga döz gelip, birek-birege gowuşmagyň arzuwynda. Ýöne ýigidiň kakasy Bagrat Singh (Türkmenistanyň at gazanan artisti Döwlet Hanmämmedow) olaryň birleşmegine garşy çykýar. Kakasy ogluny gyza öýlenmezlige yrjak bolýar.

Ýöne ýürege emir edip bolýarmy?! Netijede söýgi kyssasynyň soňy uly toýa ýazýar.

Belli hindi filmleri ýaly, sahna oýnunda hem joşgunly aýdym-sazlar, owadan lybaslar kän, elbetde, hakyky hindi ruhy duýulýar. Spektaklyň ilkinji görkezilişinde tomaşaçylar aktýorlaryň oýnuna, göze gelüwli sahna bezegine we hindi lybaslarynyň gözelligine mynasyp baha berdiler.

Şu ýyl Türkmenistan we Hindistan şanly senäni –diplomatik gatnaşyklaryň ýola goýulmagynyň 30 ýyllygyny belleýärler. Şu waka mynasybetli türkmen teatrynda goýlan oýun dostlukly ýurduň halkyna özboluşly sowgat boldy.