Şu gün hormatly Prezidentimiz Serdar Berdimuhamedow Täjigistan Respublikasynyň Türkmenistanda täze bellenen Adatdan daşary we Doly ygtyýarly ilçisi Wafo Alibek Niýatbekzodany kabul etdi.
Diplomat ynanç hatyny gowşuryp, döwlet Baştutanymyza Täjigistan Respublikasynyň Prezidenti Emomali Rahmonyň mähirli salamyny ýetirdi. Ol ösüş ýolundan ynamly öňe barýan Garaşsyz, baky Bitarap Türkmenistan bilen däp bolan dostlukly gatnaşyklary we netijeli hyzmatdaşlygy pugtalandyrmaga aýratyn ähmiýet berilýändigini nygtady.
Hormatly Prezidentimiz Serdar Berdimuhamedow dostlukly ýurduň doly ygtyýarly wekilini ýokary diplomatik wezipä bellenilmegi bilen gutlap, Täjigistanyň ýokary derejeli ýolbaşçylaryna hem-de halkyna iň gowy arzuwlaryny beýan etdi.
Döwlet Baştutanymyz Wafo Alibek Niýatbekzoda möhüm we jogapkärli wezipesinde uly üstünlikleri arzuw edip, diplomatyň tagallalarynyň iki ýurduň arasyndaky hyzmatdaşlygy mundan beýläk-de pugtalandyrmaga ýardam etjekdigine ynam bildirdi. Biziň ýurtlarymyzyň halklaryny köpasyrlyk dostluk, hoşniýetli goňşuçylyk gatnaşyklary baglanyşdyrýar. Däp bolşy ýaly, Täjigistan Türkmenistanyň ygtybarly dosty we hyzmatdaşy bolup durýar. Ýokary derejedäki saparlaryň yzygiderli guralmagy, şeýle hem biziň ýurtlarymyzyň daşary syýasat edaralarynyň arasyndaky işjeň gepleşikleriň, geňeşmeleriň netijesinde hyzmatdaşlyk pugtalandyrylýar we ösdürilýär diýip, hormatly Prezidentimiz Serdar Berdimuhamedow nygtady.
Şunuň bilen baglylykda, döwlet Baştutanymyzyň golaýda Täjigistana bolan döwlet saparynyň netijeli häsiýeti bellenildi. Şol saparyň barşynda taraplaryň özara bähbitlere, sebit we dünýä derejesinde abadançylygyň maksatlaryna laýyk gelýän netijeli hyzmatdaşlygy mundan beýläk-de pugtalandyrmaga ygrarlydygy tassyklanyldy.
Duşuşygyň barşynda bellenilişi ýaly, Türkmenistan bilen Täjigistanyň arasyndaky syýasy dialogda Birleşen Milletler Guramasy, Ýewropada Howpsuzlyk we Hyzmatdaşlyk Guramasy, Garaşsyz Döwletleriň Arkalaşygy, Ykdysady Hyzmatdaşlyk Guramasy ýaly abraýly halkara guramalaryň, sebit düzümleriniň çäklerinde ysnyşykly gatnaşyklara aýratyn ähmiýet berilýär. Türkmenistan bilen Täjigistanyň arasyndaky gatnaşyklar dürli ulgamlary, şol sanda syýasat, ykdysadyýet, medeniýet, bilim, ulag we beýleki ulgamlary öz içine alýar. Biziň maksadymyz halklarymyzyň umumy abadançylygy üçin olaryň ählisi boýunça hyzmatdaşlygy giňeltmekden we özara düşünişmegi pugtalandyrmakdan ybaratdyr. Biz gatnaşyklarymyzy ösdürmekde gazanylýan üstünliklere buýsanýarys we geljege, hyzmatdaşlygyň täze ugurlaryna uly umyt bilen garaýarys diýip, döwlet Baştutanymyz belledi.
Duşuşygyň ahyrynda hormatly Prezidentimiz Serdar Berdimuhamedow Täjigistan Respublikasynyň Adatdan daşary we Doly ygtyýarly ilçisi Wafo Alibek Niýatbekzodany Türkmenistanda işe başlamagy bilen ýene-de bir gezek gutlady we döwletara gatnaşyklary pugtalandyrmaga gönükdirilen jogapkärli wezipesinde üstünlikleri arzuw etdi.
***
Onuň Alyhezreti,
Türkmenistanyň Prezidenti
jenap Serdar Berdimuhamedowa
Siziň Alyhezretiňiz!
Täjigistan Respublikasy bilen Türkmenistanyň arasyndaky dostlukly gatnaşyklary yzygiderli ösdürmek we pugtalandyrmak maksady bilen, Wafo Alibek Niýatbekzodany Täjigistan Respublikasynyň Türkmenistandaky Adatdan daşary we Doly ygtyýarly ilçisi wezipesine bellemek kararyna geldim.
Şunuň bilen baglylykda, Siziň Alyhezretiňizden ony hoşniýetli kabul etmegiňizi hem-de meniň adymdan we Täjigistan Respublikasynyň Hökümetiniň adyndan ähli beýan etjeklerine doly ynanmagyňyzy haýyş edýärin.
Emomali Rahmon,
Täjigistan Respublikasynyň Prezidenti.
