29 ýurtdan milli olimpiýa komitetleriniň we intellektual sporty milli federasiýalarynyň wekilleri 25-nji fewralda Bangkokda (Tailand) geçirilen Aziýa intellektual (Asian Mind Sports Association, AMSA) sport birleşiginiň esaslandyryş ýygnagyna gatnaşdylar. Bu barada Türkmenistanyň Milli olimpiýa komiteti habar berdi.

Duşuşygy Aziýa Olimpiýa geňeşiniň (AOG) baş direktory Huseýn Al Musallam açyp, Aziýa intellektual sport assosiasiýasynyň, olimpiýa oýunlarynyň çäginden has ýokary derejä ýeten yklym sport maksatnamasyny giňeltmek maksady bilen döredilýändigini aýtdy.

Intellektual oýunlara we kibersporta höwesiň artmagy bilen AOG Aziýa çempionatlaryny geçirmek we bu ugurlary wagyz etmek üçin jogapkär täze guramany döretmäge başlangyjyny öňe sürdi.

Duşuşygyň esasy pursatlarynyň biri hem Aziýada mundan beýläkki işlemegi we intellektual sportuň ösdürilmegi üçin esas boljak AIOA-nyň Düzgünnamasynyň tassyklanmagy boldy.

Duşuşykda Ýerine ýetiriji geňeşiň 2025–2029-njy ýyllara saýlawlary hem geçirildi. Aziýanyň Olimpiýa Geňeşiniň wise-prezidenti we AOG-niň kibersport, söweş sungaty we intellektual sport boýunça komitetiniň başlygy Gordon Tang Assosiasiýanyň başlyklygyna saýlandy.

Täze assosiasiýanyň edarasy Singapurda ýerleşer.

Bu möhüm çärede küşt federasiýasynyň başlygy Wepa Mälikgulyýew Türkmenistana wekilçilik etdi, bu bolsa ýurdumyzyň intellektual sport pudagynda mümkinçiligini ösdürmäge we halkara başlangyçlaryna işjeň gatnaşmaga islegini görkezýär.

Tailanda saparynyň çäklerinde Wepa Mälikgulyýew bu ýurduň küşt federasiýasynyň prezidenti Sahapol Nakwaniç bilen duşuşyp, tejribe alyşmak we hyzmatdaşlygyň geljegini ara alyp maslahatlaşmak, şol sanda iki ýurduň küştçileriniň ýurtlarymyzda geçirilýän ýaryşlara gatnaşmagy ýaly meseleleri ara alyp maslahatlaşdy.