18 medal. Özbegistanyň paýtagty Daşkent şäherinde tamamlanan Aziýanyň we Okeaniýanyň bilelikdäki çempionatynda türkmen sambo pälwanlarynyň çykyşlarynyň netijesi şeýle.
Bäsleşige 20 ýurtdan 600-den gowrak pälwan gatnaşdy. Onda 16 ýaşa ýetmedik ýetginjekler, 18 ýaşy dolmadyk oglan-gyzlar we 20-den geçmedik ýaşlar hem ulular, şeýle hem ýigitlerdir gyzlar, erkekler we zenanlar sport hem söweş sambosy boýunça ýaryşlarda iň güýçli diýen at ugrunda bäsleşdiler. Baýraklar ugrunda ussatlar (baýry samboçylar), şeýle hem SVI-1 (batyllar) we SVI-2 (çala görýänler) synplarynda erkekler-de bäsleşdiler.
Türkmenistanly samboçylar jemi 3 altyn, 6 kümüş we 9 bürünç medal gazanmak bilen, ýaşlaryň, erkekleriň, zenanlaryň we ussatlaryň arasynda sambonyň sport hem söweş görnüşlerinde tapawutlandylar.
Ilki sport we söweş sambosy boýunça ýaryşda baýraklar ugrunda erkekler we zenanlar bäsleşdi. Maksatnamanyň bu görnüşinde, öň habar berlişi ýaly, ildeşlerimiz 10 medal gazandylar – 2 kümüş we 8 bürünç.
Hormat münberiniň ikinji basgançagyna sport sambosy boýunça 58 kilogram agram derejesinde Muhammetmyrat Babekow (6 bäsdeş), söweş sambosy boýunça bolsa 98 kilograma çenli agram derejesinde Bezirgen Begenjow (5 bäsdeş) çykdy. Hormat münberiniň üçünji basgançagyna bolsa sport sambosy boýunça Sapar Döwletow (64 kilograma çenli, 8 bäsdeş), Aziza Nazarowa (50 kilograma çenli, 5 bäsdeş), Züleýha Hudaýberdiýewa (54 kilograma çenli, 5 bäsdeş) we Merjen Joraýewa (59 kilograma çenli, 4 bäsdeş) we söweş sambosy boýunça ýaryşlarda ussatlar Ýusup Taňryberdiýew (58 kilograma çenli, 5 bäsdeş), Mergen Durdyýew (64 kilograma çenli, 9 bäsdeş), Zyba Orunowa (59 kilograma çenli, 4 bäsdeş) we Maýsa Gupbykowa (65 kilograma çenli, 4 bäsdeş) dagy çykdy.
Türkmenistanyň milli ýygyndy toparynyň horjunyna ýaşlar 2 altyn, 4 kümüş we 1 bürünç goşmak bilen, ýedi medal getirdi.
Ýaşlaryň arasynda söweş sambosy boýunça ýaryşda iň ýokary baýraklary Alyhan Aýdogdyýew (58 kilograma çenli, 4 bäsdeş) we Yslam Hemraýew (71 kilograma çenli, 5 bäsdeş) gazandy. Bu üstünlige barýan ýolda A.Aýdogdyýew ýarym finalda Askar Kalybekden (Gazagystan) 10:1 hasabynda üstün çykdy, finalda bolsa Asilbek Urolowy (Özbegistan) 6:0 hasabynda ýeňdi. Y.Hemraýew bolsa ýarym finalda Azamat Temirbekowdan (Gyrgyzystan) üstün çykdy we finalda Akbarali Sadullaýewi (Özbegistan) 8:0 hasabynda ýeňdi.
Sambonyň şu görnüşinde kümüş medallara Seýdylla Akmämmedow (64 kilograma çenli, 5 bäsdeş) we Mälikberdi Begiýew (88 kilograma çenli, 5 bäsdeş), sport sambosy boýunça ýaryşda bolsa Babamyrat Baýramow (58 kilograma çenli, 9 bäsdeş) we Ykbal Saparowa (50 kilograma çenli, 4 bäsdeş) dagy mynasyp boldular. Aziýanyň we Okeaniýanyň çempionatynyň iki gezek bürünç medalyny gazanan Merjen Joraýewa (59 kilograma çenli, 4 bäsdeş) sport sambosy boýunça ýaryşda bürünç medal gazandy.
Ýaryşlaryň umumy medal sanawyna girmedik jemleýji çäresinde M-2 (35-39 ýaş) toparyndaky ussatlaryň arasynda Aziýanyň we Okeaniýanyň çempiony diýen ady Türkmenistanyň milli sambo toparynyň baş tälimçisi Nurhoja Taumanow gazandy. Ol bu üstünlige 71 kilograma çenli agram derejesinde finalda Isroil Butaýewi (Özbegistan) ýeňmek bilen ýetdi.
Toparlaýyn tertip sanawunda Türkmenistanyň milli ýygyndy topary 20 toparyň arasynda Mongoliýanyň (36 medal – 4 altyn, 9 kümüş we 23 bürünç), Gyrgyzystanyň (71 medal – 4 altyn, 22 kümüş, 45 bürünç), Gazagystanyň (93 medal – 27 altyn, 30 kümüş, 36 bürünç) we Özbegistanyň (99 medal – 58 altyn, 17 kümüş, 24 bürünç) toparlaryndan yzda galyp, 5-nji ýeri eýeledi.
Geçen ýyl Makaoda geçirilen Aziýa we Okeaniýa çempionatynda türkmen sambo pälwanlary 2 altyn, 6 kümüş we 13 bürünç bolmak bilen, 21 medal gazanyp, diňe Gazagystandan (15 altyn, 7 kümüş we 4 bürünç) we Özbegistandan (8 altyn, 1 kümüş we 10 bürünç medal) yza galmak bilen, 3-nji ýeri eýeläpdiler.
