Şu gün Aşgabatda baýramçylyk ruhunda geçirilen köpçülikleýin ylgawa dürli ýaşdaky 500-den gowrak adam gatnaşdy.

Ýewropa Bileleşiginiň Türkmenistandaky wekilhanasy, Türkmenistanyň Bedenterbiýe we sport baradaky döwlet komiteti we Aşgabat şäheriniň häkimligi bilen bilelikde guralan bu gyzykly çäre 2024-nji ýylyň mart aýynda BMG-niň Baş Assambleýasy tarapyndan ýurdumyzyň başlangyjy bilen yglan edilen Halkara parahatçylyk we ynanyşmak ýylyna bagyşlandy. Onuň ählumumy derejede ykrar edilmegi parahatçylykly gatnaşyklary ösdürmegiň we halklaryň arasynda ynanyşmagy pugtalandyrmagyň möhümdigini nygtaýar. Geçirilen ylgaw boýunça sport baýramynyň bu gymmatlyklaryň beýany bolup, adamlary sport arkaly birleşdirmegi, sagdyn we işjeň durmuş ýörelgesini höweslendirýändigi hem-de agzybirlik ruhuny berkidýändigi begendirýär.

Köpçülikleýin ylgawa gatnaşyjylaryň giň toparyna niýetlenen üç aralykda 2 km aralyga ulular bilen bilelikde 6 ýaşdan uly ýaşly çagalary bolan maşgalalar, 5 we 10 km aralyga 16 ýaşdan ulular gatnaşdylar. Ol paýtagtymyzyň merkezi ýerlerinden biri bolan Garaşsyzlyk seýilgähiniň töwereginde guralyp, oňa gatnaşyjylara guramaçylykly we şadyýan ylgawy üpjün etdi.

Ýaryşlardan başga-da, çärede baýramçylyk ruhuny goşalandyrýan birnäçe goşmaça çäreler hem boldy. Çagalar we maşgalalar üçin guralan gyzykly bäsleşikler hyjuwly we şadyýan ruhda geçdi we döwrebap sazlar bu çäräni oňa gatnaşanlar üçin ýatdan çykmajak waka öwürdi.

Köpçülikleýin sport ýaryşlary umumy gymmatlyklara we jemgyýetde parahatçylyk, saglyk we jebislik isleglerine esaslanýan Ýewropa Bileleşigi bilen Türkmenistanyň arasyndaky pugta hyzmatdaşlygyň aýdyň mysaly boldy.