2025-nji ýylyň 4-nji oktýabrynda Aşgabatdaky Olimpiýa şäherçesiniň Ýeňil atletika toplumynda halkara derejesindäki krossfit ýaryşy – «Fitness Games» geçirildi. Bu sport baýramçylygy Türkmenistan bilen Birleşen Arap Emirlikleriniň arasynda diplomatik gatnaşyklarynyň ýola goýulmagynyň 30 ýyllygyna bagyşlanyp, BAE-niň Türkmenistandaky ilçihanasy tarapyndan, Türkmenistanyň Bedenterbiýe we sport baradaky döwlet komitetiniň goldawy bilen guraldy.
Dostluk oýunlarynyň dabaraly açylyşyna Türkmenistanyň Bedenterbiýe we sport baradaky döwlet komitetiniň wekilleri, ýurdumyzda işleýän diplomatik wekilhanalaryň ýolbaşçylary, köpçülikleýin habar beriş serişdeleriniň wekilleri, talyplar gatnaşdy. Açylyş dabarasyna gatnaşýanlaryň görkezme çykyşlary görkezildi.
Sport ýaryşlaryna türkmen ýeňil atletikaçylar, gimnastikaçylar, gündogar söweş sungatlarynyň ýaş ussatlary, Aşgabadyň höwesjeň türgenleri hem-de diplomatik korpusyň wekilleri gatnaşdylar. Oýunlaryň maksatnamasyna çagalar bilen gysga aralyga maşgala ylgawy, tans bäsleşigi, «berpi» toplumy (squats, push-up we squat bökmek) girizildi. «Fitness Games» ýaryşlarynyň ýeňijileri BAE-niň ilçihanasynyň adyndan gymmat bahaly sowgatlara we baýraklara mynasyp boldular.
Baýramçylyk çäräniň çäklerinde «Fly Dubai» awiakompaniýasynyň ýol petekleriniň lotereýasy geçirildi. Şeýle-de tomaşaçylara we gatnaşyjylara milli süýjülikler hödürlendi.
BAE-niň Türkmenistandaky ilçisi dabarada çykyş edip, türkmen halkyna mahsus bolan häsiýetlerini, ýagny iki dostlukly ýurduň diplomatik gatnaşyklarynyň soňky otuz ýylda birek-birege hormat goýmak, deňhukuklylyk ýörelgelerine esaslanyp, hemmetaraplaýyn hyzmatdaşlykda ösýändigini nygtap geçdi. Diplomatik wekil Türkmenistanyň Prezidenti Serdar Berdimuhamedowyň baştutanlygynda, döwletara hyzmatdaşlygyň yzygiderli giňeldilýändigi üçin ýurdumyzyň Hökümetine hoşallyk bildirdi.
Öz gezeginde Türkmenistanyň Bedenterbiýe we sport baradaky döwlet komitetiniň başlygynyň orunbasary Şöhrat Mämmedow çykyş edip, türkmen halkynyň Milli Lideri Gahryman Arkadagymyzyň taýsyz tagallalarynyň netijesinde halkara sport hyzmatdaşlygynyň üstünlikli ösdürilýändigini nygtady. Şeýle hem Mämmedow, Garaşsyz, baky Bitarap Türkmenistan sport arkaly halklaryň arasynda düşünişmegiň, parahatçylygyň we dostlugyň binýadyny düzýän gymmatlyklary ösdürýändigini belledi.
